’لبنان میں دہشت گرد حملے اسرائیلی مہم جوئی کا ثبوت ہے‘

• جرائم

اسلام آباد: ترجمان دفتر خارجہ ممتاز زہرہ بلوچ کا کہنا ہے کہ لبنان میں دہشت گرد حملے اسرائیلی مہم جوئی کا ثبوت ہے۔

اے آر وائی نیوز کے مطابق ترجمان دفتر خارجہ ممتاز زہرہ بلوچ کا کہنا ہے کہ لبنان میں اسرائیلی دہشت گرد حملے خطے میں خطرناک مہم جوئی کا مظہر ہیں جس سے علاقائی امن و سلامتی کو خطرہ لاحق ہے۔

انہوں نے کہا کہ پاکستان لبنان کی خود مختاری اور علاقائی سالمیت کے لیے حمایت جاری رکھے گا۔

ترجمان دفتر خارجہ کا کہنا تھا کہ عالمی برادری اسرائیل کو عالمی دہشت گردی سے روکے اور عالمی قوانین کی خلاف ورزیوں کا محاسبہ کرنے کے لیے اقدامات کرے۔

واضح رہے کہ لبنانی وزارت صحت کے مطابق لبنان میں مواصلاتی آلات میں دھماکوں کے نتیجے میں جاں بحق افراد کی تعداد 37 ہوگئی ہے جبکہ حملوں میں زخمی ہونے والے 287 افراد کی حالت تشویشناک ہے۔

لبنانی وزیراعظم نجیب میقاتی کا کہنا ہے کہ سلامتی کونسل اسرائیلی جارحیت روکنے کے لیے ٹھوس مؤقف اختیار کرے، یہ معاملہ صرف لبنان کا نہیں بلکہ پوری انسانیت کا ہے۔

لبنانی وزیر خارجہ کا کہنا ہے کہ خود مختاری، سلامتی پر حملہ خطرناک ہے جو وسیع جنگ کا اشارہ ہے۔

علاوہ ازیں دھماکوں کے بعد لبنان میں مسافروں کے طیاروں میں پیجرز اور واکی ٹاکی لے جانے پر بھی پابندی عائد کردی گئی ہے۔