پنجاب میں چینی سرمایہ کاروں نے 700 ملین ڈالر سرمایہ کاری پر رضامندی ظاہر کردی۔
پنجاب ہاؤس اسلام آباد میں چین کے اعلیٰ سطح کے وفد نے وزیر اعلیٰ پنجاب سے ملاقات کی اور پنجاب میں 700 ملین ڈالر سرمایہ کاری پر رضا مندی ظاہر کی۔
وزیر اعلیٰ کا کہناتھاکہ چین کے تعاون سے پنجاب کو سب سے بڑا آرٹیفشل انٹیلی جنس سینٹر بنانا چاہتے ہیں، چینی کمپنی نواز شریف آئی ٹی سینٹر میں کمپیوٹنگ سینٹر بھی قائم کرے گی۔
ملاقات میں پہلا ای کامرس پلیٹ فارم اور نوازشریف آئی ٹی سٹی میں ڈیٹا اور کلاؤڈ سینٹر قائم کرنے پر اتفاق کیا گیا، چینی کمپنی پاکستانی نوجوانوں کو آن لائن ورلڈ وائیڈ ٹریڈنگ کی بھی ٹریننگ دے گی۔ 
لاہور میں اسمارٹ کنٹرول روم، اسمارٹ ٹریفک کنٹرول، اسمارٹ ٹرانسپورٹ، اسمارٹ سینی ٹیشن سینٹر بھی قائم ہوگا۔ 
اس حوالے سے مریم نواز کا کہنا تھاکہ پنجاب بہت جلد خطے کا آئی ٹی حب بنے گا، بچوں کو آئی ٹی سیکٹر میں سب سے برتر دیکھنا چاہتے ہیں، چینی کمپنی کے تعاون سے ای ٹیکسی سروس کا آغاز بھی کیاجائے گا۔

کراچی: انٹربینک تبادلہ میں روپے کی مقابلے ڈالر کی قدر میں اضافہ ہوگیا۔

اسٹیٹ بینک آف پاکستان کے مطابق انٹربینک میں ڈالر 278 روپے 35 پیسے پر بند ہوا۔

انٹربینک میں آج ڈالر 12 پیسے مہنگا ہوا، گزشتہ روز انٹربینک میں ڈالر 278 روپے 23 پیسے پر بند ہوا تھا۔

اوپن مارکیٹ میں ڈالر 15 پیسے منہگا ہوکر 279 روپے 34 پیسے پر بند ہوا۔

پاکستان اسٹاک ایکسچینج میں آج کاروبار میں شدید مندی کا رجحان رہا۔

پاکستان اسٹاک ایکسچینج میں 100انڈیکس 3700 پوائنٹس سے زائد گرگیا۔ کاروبار کے دوران 100 انڈیکس ایک لاکھ 10 ہزار 896 پوائنٹس تک گرا تاہم کاروبار کے اختتام پر 100 انڈیکس 3790 پوائنٹس کی کمی کے بعد 1 لاکھ 11 ہزار 70 پوائنٹس پر بند ہوا۔

حصص بازار میں 1.11 ارب شیئرز کے سودے طے ہوئے جن کی مالیت 60 ارب روپے رہی  جبکہ مارکیٹ کیپٹلائزیشن 437 ارب روپے کم ہوکر 14145 ارب روپے ہے۔ 

ماہرین کا کہنا ہے کہ اسٹاک مارکیٹ میں کریکشن آرہی ہے، جلدی ریکوری بھی ہوجائے گی۔

کراچی: ایف آئی اے نے برآمدی چاول میں پھپھوندی کی شکایات  پر ایکشن لیتے ہوئے پلانٹ پروٹیکشن ڈیپارٹمنٹ کے 10 سے  زائد افسران کو گرفتار کرلیا۔

ایف آئی اے اینٹی کرپشن کی تحقیقاتی رپورٹ کے مطابق  یورپ کے لیے چاول کی 104 کنسائمنٹس میں پھپھوندی اور منرل آئل کی شکایات سامنے آئیں۔ شکایات  پر اعلیٰ حکام کی جانب  سے ایف آئی اےکو تحقیقات کا حکم دیا گیا۔

 تحقیقاتی رپورٹ کے مطابق پلانٹ پروٹیکشن کے افسران  نے قوانین کے خلاف چاول کے سرٹیفکیٹ جاری کیے۔ 104کنسائمنٹس کے سرٹیفکیٹ  پر سوالات اٹھائےگئےکہ  یہ عمل پلانٹ پروٹیکشن کے قوانین کےخلاف ہے۔

ایف آئی اے کی رپورٹ کے مطابق سرٹیفکیٹ جاری کرنا اینٹامولوجسٹ کا کام ہے۔ تحقیقات  مکمل ہونے پر ڈیپارٹمنٹ پلانٹ پروٹیکشن کے17اینٹامولوجسٹ کے خلاف مقدمہ درج کیا گیا۔ مقدمےکے اندراج کے بعد ایف آئی اے اینٹی کرپشن  سرکل نے 10 سے زائد افسران کو گرفتار کیا۔

ایف آئی اے حکام کے مطابق وفاقی اینٹی کرپشن عدالت سے ملزمان کا ریمانڈ حاصل کرنے کے بعد تحقیقات جاری ہیں۔