گنڈاپور کی نامناسب زبان، پی ٹی آئی نے صحافی برادری سے معافی مانگ لی
وزیراعلیٰ خیبرپختونخوا علی امین گنڈاپور کی نامناسب زبان پر پاکستان تحریک انصاف نے صحافی برادری سے غیرمشروط معافی مانگ لی ہے۔
اپوزیشن لیڈر قومی اسمبلی اور تحریک انصاف کے مرکزی رہنما عمر ایوب نے قومی اسمبلی میں کہا کہ تحریک انصاف صحافی برادری سے غیرمشروط معافی مانگتی ہے، وزیراعلٰی کے پی علی امین صحافی برادری سے خود معذرت کریں گے۔
عمر ایوب نے کہا کہ صحافی مشکل ترین حالات میں کوریج کرتے ہیں، پی ٹی آئی صحافی برادری کی خدمات کو قدر کی نگاہ سے دیکھتی ہے۔
اس سے قبل صحافیوں کی جانب سے قومی اسمبلی اجلاس کا بائیکاٹ کیا گیا تھا تاہم قومی اسمبلی کے فلور پر عمرایوب کی واضح معذرت کے بعد صحافیوں نے بائیکاٹ ختم کیا۔
دریں اثنا چیئرمین پی ٹی آئی بیرسٹرگوہر کا قومی اسمبلی اجلاس سے خطاب میں کہنا تھا کہ علی امین گنڈاپور کے بیان پر غیرمشروط معافی مانگی ہے، علی امین نے صحافیوں کو ملاقات کیلئے پیغام بھجوایا ہے۔
بیرسٹر گوہر نے کہا کہ صحافی برادری ہمیشہ پی ٹی آئی کے ساتھ کھڑی رہی، صحافی برادری نے مشکل وقت میں پی ٹی آئی کا بھرپور ساتھ دیا۔
چیئرمین پی ٹی آئی نے کہا کہ صحافیوں سے کبھی کوریج نہ دینے کا شکوہ نہیں کیا، اسمبلی اجلاس بائیکاٹ ختم کرنے پر صحافی برادری کا شکرگزار ہوں۔
ایک جائزہ چھوڑیں۔