اسلام آباد: وفاقی وزیر احسن اقبال کا کہنا ہے کہ امید کرتا ہوں کہ پاکستان 2026 تک اپنا ایسٹروناٹ خلا میں بھیجنے میں کامیاب ہوجائے گا۔
اے آر وائی نیوز کے مطابق وفاقی وزیر برائے منصوبہ بندی احسن اقبال نے تقریب سے خطاب کرتے ہوئے کہا کہ پاکستان 2026 تک پاکستان اپنا ایسٹروناٹ خلا میں بھیجنے میں کامیاب ہوگا اور امید کرتا ہوں کہ سپارکو اس چیلنج کو قبول کرتے ہوئے پاکستان کو لیڈنگ ملک بنائے گا۔
انہوں نے کہا کہ آنے والے دور میں جدید
ٹیکنالوجی کے بغیر ترقی ممکن نہیں، جو ملک جدید ٹیکنالوجی میں پیچھے رہے وہ
ڈیولپمنٹ میں پیچھے رہ جائیں گے۔
احسن اقبال نے کہا کہ پاکستان نے سب سے پہلے 1960 کے بعد اسپیس پروگرام شروع کیا خیال تھا کہ پاکستان اس سیکٹر میں ایشیا کا لیڈنگ ملک ہوگا لیکن بدقسمتی سے اسپیس ٹیکنالوجی میں ہم اپنی برتری قائم نہ رکھ سکے۔
وفاقی وزیر نے کہا کہ دیکھتے دیکھتے جو ممالک ہم سے پیچھے تھے وہ آگے نکل گئے، ہم نے جن شعبوں میں پالیسی کو جاری رکھا وہاں کامیاب ہوئے، ہمسایہ ملک کو فوری جواب دے کر پاکستان کو ایٹمی طاقت بنایا۔
انہوں نے مزید کہا کہ نیوکلیئر ٹیکنالوجی میں نیشنل کمٹمنٹ میں تبدیلی نہ آئی تو ناممکن کو ممکن کردکھایا۔
کراچی: متبادل توانائی سے بجلی کی پیداوار کے منصوبوں میں کےالیکٹرک کو بڑی کامیابی مل گئی۔
تفصیلات کے مطابق کےالیکٹرک کو 220 میگاواٹ سائٹ نیوٹرل ہائبرڈ پراجیکٹ کے لیے 7 بولیاں موصول ہوئی ہیں یہ پاکستان کا پہلا شمسی اور ہوا سے بجلی کی پیداوار کرنے والا ہائبرڈ منصوبہ ہوگا۔
سی ای او کے الیکٹرک مونس علوی کا کہنا ہے
کہ نیا منصوبہ تکنیکی لحاظ سے ہمارے بلوچستان میں واقع شمسی توانائی
پراجیکٹ سے کہیں زیادہ پیچیدہ ہے ہمارے 370 میگاواٹ کے پراجیکٹس کو ریکارڈ
2690 میگاواٹ کے برابر آفرز موصول ہوئی ہیں۔
انہوں نے کہا کہ متبادل توانائی کے منصوبے میں پورے عمل میں مسلسل تعاون کے لیے نیپرا کے مشکور ہیں جب کہ کے-الیکٹرک کے پاکستان کی انرجی سیکیورٹی کے عزم کے ساتھ اعادہ کرنے والے سرمایہ کاروں کا بھی شکر گزار ہے سرمایہ کاروں کی بھرپور شرکت ملک میں بتدریج معاشی بحالی اور نجکاری عمل میں اعتماد کا ثبوت ہے۔
ان کا کہنا تھا کہ متبادل توانائی سے بجلی کی لاگت کم کرنے اور مہنگے درآمدی ایندھن پر انحصار کم ہوگا، کراچی میں مزید دو منصوبے دیہہ ہلکانی میں 120 میگاواٹ اور دیہہ میٹھا گھر میں 150 میگاواٹ پر کام جاری ہے، کےالیکٹرک کے بلوچستان میں وندر ،بیلہ اور سندھ میں دھابیجی، پر متبادل توانائی کے منصوبے سرمایہ کاروں کو پیش کیے ہیں۔
لاہور الیکٹرک سپلائی کمپنی (لیسکو) نے صارفین کی بجلی کے بلوں تک رسائی کے لیے آن لائن سروس متعارف کروادی۔
لاہور، شیخوپورہ، قصور، اوکاڑہ اور ننکانہ صاحب سمیت پنجاب کے پانچ اضلاع میں 4.5 ملین سے زائد صارفین کو خدمات فراہم کرنے والے ادارے لیسکو نے بجلی کے بلوں تک آسان رسائی کی سہولت کے لیے یہ اقدام شروع کیا ہے۔
اس سے قبل لیسکو ہر ماہ بجلی کے بلوں کی پرنٹ شدہ کاپیاں صارفین کو گھر کی دہلیز پر بھیجتا تھا۔
تاہم اب آن لائن سروس کے آغاز کے بعد
صارفین اب اپنے بجلی کے بل کی کاپی ڈاؤن لوڈ کرنے کے لیے لیسکو کی سرکاری
ویب سائٹ پر جا سکتے ہیں۔
آن لائن ڈپلیکیٹ بل حاصل کرنے کے لیے صارفین کو اپنا حوالہ نمبر درج کرنا ہوگا، جو ان کے بیچ نمبر، سب ڈویژن نمبر، حوالہ نمبر، اور ’آر‘ یا ’یو‘ کوڈ کا مجموعہ ہے۔
علاوہ ازیں متبادل طور پر وہ اپنی کسٹمر آئی ڈی درج کرکے بھی بل دیکھ سکتے ہیں۔
آن لائن سروس اگست 2024 اور اس کے بعد کے بلوں تک رسائی کے لیے صارفین کو دستیاب ہوگی۔
اسلام آباد: ملک میں انٹرنیٹ کی سست روی اور ڈی گریڈیشن کے معاملے پر پاکستان ٹیلی کمیونکیشن اتھارٹی (پی ٹی اے) کی اہم وضاحت آگئی۔
پی ٹی اے نے واضح کیا ہے کہ پاکستان کو عالمی سطح پر ملانے والی 7میں سے2سب میرین کیبلز میں خرابی آئی جس میں سے ایک کیبل کو ایران، قطر میں ری راؤٹنگ سے 250جی کی بندش کا سامنا کرنا پڑا جب کہ دوسری سب میرین کیبل بھی کراچی کے قریب خراب ہے۔
بیان میں بتایا گیا ہے کہ صارفین کیلئے آپریٹرز دیگر دستیاب کیبلز پر ٹریفک کو دوبارہ راؤٹ کر رہے ہیں متعلقہ ٹیمیں خرابی دور کرنے کے حوالے سے اقدامات کر رہی ہیں۔
اتھارٹی کا کہنا ہے کہ پی ٹی اے انٹرنیٹ رفتار معمول پر آنے تک صورتحال پر
نظر رکھے ہوئے ہیں اس سلسلے میں مزید پیش رفت سے صارفین کو مطلع کر دیا
جائے گا۔
وزیراعظم شہبازشریف نے نوازشریف اور مریم نواز کی جانب سے تاریخی بجلی ریلیف پیکیج کا خیرمقدم کرتے ہوئے کہا ہے کہ 500 یونٹ تک کےصارفین کیلئے 14روپے فی یونٹ کا ریلیف احسن اقدام ہے۔
اپنے بیان میں وزیراعظم نے کہا کہ بجلی ریلیف نوازشریف اوروزیراعلیٰ پنجاب کا عوام دوست اقدام ہے نوازشریف کی ہدایت پر عوامی ریلیف کو حکومت کی اولین ترجیح رکھا،وفاقی ترقیاتی بجٹ میں 50 ارب روپے کم کر کے بجلی قیمتوں میں ریلیف دیا جس سے 200 یونٹ والےصارفین مستفید ہو رہے ہیں،
انہوں نے کہا کہ حکومت لوگوں کی زندگی آسان کرنے کیلئے اقدامات اٹھا رہی ہے معاشی استحکام کے بعد ملک درست سمت کی طرف گامزن ہے عوامی ریلیف اور مہنگائی میں کمی حکومت کی اولین ترجیح ہے بجلی کی قیمتوں میں کمی کے دیرپا حل کےلیےکام ہو رہا ہے اور بجلی کی قیمتوں میں کمی کےلیے ہر ممکن کوشش کر رہے ہیں۔
ان کا کہنا تھا کہ بجلی چوری کیخلاف اقدامات اور اصلاحات سے پائیدار حل کیلئے کوشاں ہیں نوازشریف کی قیادت میں معاشی استحکام کے بعد عوام کیلئے اقدامات اٹھا رہے ہیں۔
پاکستان میں انٹرنیٹ بندش کا اقدام کو لاہور ہائیکورٹ میں چیلنج کردیا گیا، اس اہم کیس کے حوالے سے کل سماعت ہوگی۔
عدالت میں دائر پٹیشن میں درخواست گزار کا کہنا تھا کہ پاکستان میں نامعلوم وجوہات کی بنا پر انٹرنیٹ کو سست کردیا گیا ہے، انٹرنیٹ کی اس طرح بندش سے آئی ٹی سے وابستہ کاروبار بُری طرح متاثر ہورہے ہیں۔
درخواست میں کہا گیا کہ دنیا جدید ترین ٹیکنالوجی پر جارہی ہے اور پاکستان کے آئی ٹی سیکٹر کو تباہ کیا جارہا ہے، پاکستانی کمپنیاں اور نوجوان اربوں کا زرمبادلہ آئی ٹی سے کمارہے ہیں۔
عدالت سے استدعا میں کہا گیا کہ حکومت کو پابند کیا جائے کہ مستقبل میں انٹرنیٹ کو شٹ ڈاؤن نہ کیا جائے، درخواست پر کل ہائیکورٹ کے جسٹس شکیل احمد سماعت کریں گے۔
کراچی: وزیر توانائی سندھ ناصر حسین شاہ کا کہنا ہے کہ ہم 100 یونٹ مفت بجلی دینا شروع کررہے ہیں۔
اے آر وائی نیوز کے مطابق صوبائی وزیر توانائی ناصر شاہ کا کہنا ہے کہ بجلی کے بل زیادہ آرہے ہیں، شہری پریشان ہیں، ہمارا انتخابی منشور بنا تو اس میں 300 یونٹ بجلی فری دینے کا وعدہ کیا تھا۔
انہوں نے کہا کہ سندھ میں 300 یونٹ تک مفت بجلی کے لیے کافی حد تک کام کیا ہے، ہم 100 یونٹ مفت بجلی دینا شروع کررہے ہیں، دوسرے مرحلے میں 200 پھر 300 یونٹ تک مفت بجلی دیں گے۔
وزیر توانائی نے کہا کہ سندھ حکومت کے سولرائزیشن کے دو پروگرام ہیں، 5 لاکھ تک سولر پینل دینے کا منصوبہ ہے، کوشش ہے کہ اگست میں ہی 50 ہزار سولر پینل کی تقسیم کریں، ہم سندھ میں دو لاکھ تک سولر پینل فراہم کریں گے۔
ناصر شاہ نے کہا کہ سولر پارک بنانے جارہے ہیں جس سے بجلی این ٹی ڈی سی کو دیں گے، سندھ کے سروے میں 26 لاکھ کے قریب آف گریڈ گھرانے ہیں۔
انہوں نے کہا کہ وفاقی حکومت بجٹ میں صوبوں کے لیے پی ایس ڈی پی بناتی ہے، سندھ کی سڑکیں بھی این ایچ اے کی ذمہ داری ہے۔
وزیر توانائی نے کہا کہ بلاول بھٹو آئندہ وزیراعظم ہوں گے پھر پورا ملک ترقی کرے گا، بہت سے لوگ سوشل میڈیا پر کہتے ہیں پی پی نے سندھ تباہ کردیا لیکن عوام سندھ حکومت اور پیپلزپارٹی پر اعتماد کرتی ہے۔
وفاقی دارالحکومت اسلام آباد میں طالبات اور خواتین اساتذہ کو بڑی سفری سہولت فراہم کر دی گئی۔
سات اگست سے اسلام آباد میں طالبات اور خواتین اساتذہ کیلئے گلابی بسیں دستیاب ہوں گی۔ وزیراعظم کی ہدایات پر شروع کی جانے والی گلابی بسیں تمام بڑے راستوں پر چلیں گی۔
وزارت تعلیم کا کہنا ہے کہ اقدام کا مقصد اسلام آباد میں لڑکیوں کی تعلیم اور خواتین کو بااختیار بنانا ہے دیہی علاقوں کو شہری مراکز سے جوڑ کر ان کیلئے سفر کو آسان اور محفوظ بنائیں گی۔
وزارت تعلیم کے مطابق بسز سے طالبات اور خواتین اساتذہ کیلئے مفت، محفوظ
اور آسان نقل و حمل ممکن ہو گا ان بسز سے طالبات کی تعلیم اور خواتین کو
بااختیار بنانے کی حوصلہ افزائی ہو گی اس آپریشن کو یقینی بنانے کیلئے
باقاعدہ نگرانی اور تشخیص یقینی بنائی جائےگی۔
