پاکستان نے 3 میچز کی ون ڈے سیریز کے دوسرے میچ میں جنوبی افریقا کو 81 رنز سے شکست دیکر سیریز اپنے نام کرلی۔

پاکستان نے تین میچز کی سیریز  میں جنوبی افریقا پر 0-2 کی برتری حاصل کرلی، پاکستان کے کامران غلام مین آف دی میچ قرار پائے۔

پاکستان نے تیسری مرتبہ جنوبی افریقا میں ون ڈے سیریز جیتی،  پاکستان اکیسویں صدی میں جنوبی افریقا میں تین مرتبہ ون ڈے سیریز جیتنے والی پہلی ٹیم بن گئی۔

کیپ ٹاؤن میں کھیلے جارہے میچ میں جنوبی افریقا کے کپتان ٹیمبا باووما نے ٹاس جیت کر پاکستان کو بیٹنگ کی دعوت دی۔

جنوبی افریقا کی دعوت پر پاکستان ٹیم 49.5 اوورز میں 329 رنز بناکر آؤٹ ہوئی۔

پہلی اننگز

پاکستان کی جانب سے صائم ایوب 25، عبداللہ شفیق صفر، بابر اعظم 73 اور کپتان محمد رضوان 80 رنز بناکر آؤٹ ہوگئے۔سلمان علی آغا نے 33 رنز کی اننگز کھیلی۔

اختتامی اوورز میں کامران غلام نے 5 چھکوں کی مدد سے 32 گیندوں پر 63 رنز بنائے۔اس کے علاوہ عرفان خان نے 15، شاہین آفریدی نے 16، حارث رؤف نے 6 رنز اسکور کیے۔

جنوبی افریقا کی جانب سے مفاکا نے 4، مارکو یانسن نے 3  وکٹیں حاصل کیں۔

دوسری اننگز

میچ کی دوسری اننگز میں پاکستان کی 329 رنز کے ہدف کا تعاقب کرتے ہوئے جنوبی افریقا کے ہینرک کلاسین نے 74 گیندوں پر 4 چھکوں اور 8 چوکوں کی مدد سے 97 رنز بنائے۔

جنوبی افریقی بیٹر ٹونی زیزورزی 34، ڈیوڈ ملر 29،  ریسی وین ڈر ڈیسن 23، ایڈن مارکرم 21 اور ٹیمبا باؤما 12 رنز اسکور کر پائے۔

پاکستانی فاسٹ بولر شاہین شاہ آفریدی نے 8 اوورز  میں 47 رنز دیکر چار وکٹیں حاصل کیں، نسیم شاہ 3 اور ابرار احمد 2 وکٹیں حاصل کر پائے جبکہ سلمان آغا کے حصے میں ایک وکٹ آیا۔

 دوسرے ون ڈے کیلئے جنوبی افریقا کی ٹیم میں 4 تبدیلیاں کی گئی ہیں جبکہ پاکستان  ٹیم نے وننگ کمبینیشن کو برقرار رکھا اور کوئی تبدیلی نہیں کی۔

واضح رہے کہ پاکستان نے پہلے ون ڈے میں میزبان جنوبی افریقا کو 3 وکٹوں سے شکست دے کر سیریز میں ایک صفر کی برتری حاصل کی تھی۔

بھارت کے اسٹار اسپنر  روی چندرن ایشون نے انٹرنیشنل کرکٹ سے ریٹائرمنٹ کا اعلان کر دیا۔

برسبین میں آسٹریلیا کے خلاف  تیسرے ٹیسٹ میچ کے اختتام پر روی چندرن ایشون نے کپتان روہت شرما کے ساتھ پریس کانفرس میں اپنی ریٹائرمنٹ کا اعلان کیا۔

اس موقع پر  روی چندرن ایشون کا کہنا تھا کہ ’کرکٹ کے اس سفر میں جس نے بھی ساتھ دیا خصوصی طور پر بی سی سی آئی، ویرات کوہلی، روہت شرما، اجنکیا رہانے اور چتیشور پجارا ان سب کا شکریہ‘۔

روی ایشون کا کہنا تھاکہ ’ تمام فارمیٹس میں بطور کرکٹر میرا آخری دن تھا، اپنے کیرئیر کے دوران بہت انجوائے کیا، کئی یادگار لمحے ہیں اور  ریٹائرمنٹ کا یہ لمحہ کافی جذباتی ہے‘۔ 

دوسری جانب بھارتی کرکٹ بورڈ نے بھی  ایشون کو ریٹائرمنٹ پر خراج تحسین پیش کیا ہے۔

 بی سی سی آئی نے سوشل میڈیا پر جاری  پیغام میں لکھا کہ زبردست کیرئیر پر ایشون کو مبارک ہو۔ 

یاد رہے کہ ایشون نے 106 ٹیسٹ میچز میں بھارت کی نمائندگی کی جس میں انہوں نے 537 وکٹیں اپنے نام کی  جبکہ 116 ون ڈے اور 65 ٹی ٹوئنٹی میچز کھیلے ہیں۔

جنوبی افریقا نے پاکستان کے خلاف 2 ٹیسٹ میچز کی سیریز کیلئے اپنے 16 رکنی اسکواڈ کا اعلان کر دیا۔

پاکستان اور جنوبی افریقا کے درمیان ٹی ٹوئنٹی سیریز کے بعد اب ون ڈے سیریز جاری ہے جہاں گزشتہ روز پہلے ون ڈے میں پاکستان نے میزبان ٹیم کو شکست دی۔

ون ڈے سیریز ختم ہونے کے بعد پاکستان اورجنوبی افریقا کے درمیان 2 ٹیسٹ میچز کی سیریز کھیلی جائے گی۔ سیریز کا پہلا ٹیسٹ 26 دسمبر سے سنچورین میں شروع ہوگا۔

جنوبی افریقا نے پاکستان کے خلاف ٹیسٹ سیریز کیلئے اپنے 16 رکنی اسکواڈ کا اعلان کر دیا۔

ٹیسٹ سیریز میں جنوبی افریقی ٹیم کی قیادت ٹیمبا باووما کریں گے۔

اس کے علاوہ دیگر کھلاڑیوں میں ڈیوڈ بیڈنگھم،کوربن بوش، میتھیو بریٹزکے، ٹونی ڈی زوری، مارکو یانسن، کیشوو مہاراج، کوینا مافاکا، ایڈن مارکرم، ویان ملڈر، سینورن متھوسامی، ڈین پیٹرسن، کاگیسو رباڈا، ریان رکلیٹن، ٹرسٹن اسٹبز، کائل ویریانے شامل ہیں۔
واضح رہے کہ اسپنر کیشو مہاراج پاکستان کے خلاف پہلے ون ڈے میچ سے قبل گروئن انجری کا شکار ہوئے تھے ،ان کی انجری کا جائزہ لینے کے لیے آج اسکین ہوگا۔

پاکستان کرکٹ ٹیم کے ٹاپ آرڈر بیٹر صاحبزادہ فرحان کا کہنا ہے کہ میری پسندیدہ بیٹنگ پوزیشن اوپننگ ہے، اسی نمبر پر ساری کرکٹ کھیلی، بیٹنگ نمبر تبدیل ہو تو  مسئلہ ضرور ہوتا ہے۔
تینوں فارمیٹس کو ساتھ لے کر چلنا مشکل ہوتاہے لیکن پروفیشنل کے طور پر تیار رہنا پڑتا ہے۔

انہوں نے کہا کہ تینوں فارمیٹس کی تیاری نئی بات نہیں، 10،8 سال سے اسی طرح تیاری کرتا ہوں، ہر فارمیٹ میں پرفارمنس دینا چیلنجنگ ضرور ہوتاہے لیکن محنت جاری رکھتے ہیں، موقع جس مرضی فارمیٹ میں ملے سو فیصد دینے کی کوشش ہوتی ہے۔

صاحبزادہ فرحان کا کہنا تھا کہ ٹیسٹ کرکٹ اور ایک روزہ میچ میں عبداللہ شفیق، شان مسعود، صائم ایوب پرفارمنس دے رہے ہیں، میری دعا ہے ساتھی کھلاڑی پرفارمنس دیں لیکن اگر پرفارمنس نہیں ہوتی تو ان کی جگہ موقع ملےگا۔

ان کا کہنا تھا کہ ٹی ٹوئنٹی میں جگہ تھی جس میں قومی ٹیم میں مجھے منتخب کیاگیا، میں ڈومیسٹک کرکٹ کا ہر ٹورنامنٹ کھیلتاہوں، ریڈبال میں گزشتہ سال ٹاپ کیا تھا، ڈومیسٹک پرفارمنس دیکھنی چاہیے، اگر جگہ نہ بھی ہو تو اسکواڈ میں ضرور شامل کرنا چاہیے۔

صاحبزادہ فرحان  نے کہا کہ ڈومیسٹک اور پی ایس ایل میں بیٹنگ آرڈر تبدیل ہو تو چل جاتاہے، انٹرنیشنل کرکٹ میں کھلاڑی کا بیٹنگ آرڈر تبدیل ہو تو مشکل ہوتی ہے۔

انہوں نے کہا کہ 10،8  سال سے ٹاپ آرڈر بیٹر کے طور پر کھیل رہاہوں، ڈومیسٹک کرکٹ میں ٹاپ آرڈر میں کھیل کر موقع اگر مڈل آرڈر میں ملے تو مشکل ہوجاتی ہے، مڈل آرڈر میں پہلی بال سے ہٹنگ کرنی ہوتی ہے۔

صاحبزادہ فرحان کا کہنا تھا کہ میری پسندیدہ بیٹنگ پوزیشن اوپننگ کی ہے کیونکہ اسی نمبر پر ساری کرکٹ کھیلی، بطور اوپنر ہی ڈومیسٹک کرکٹ میں پرفارمینس دی ہیں، بیٹنگ نمبر تبدیل ہو تو مشکل ضرور ہوتی ہے۔

انہوں نے کہا کہ ٹیم میں منتخب ہونا اور ڈراپ ہونا تو چلتا رہتا ہے، سینیئر کھلاڑی بھی کئی کئی بار ٹیم سے ڈراپ ہوئے اور واپس آئے، تینوں فارمیٹس کھیلنے کے لیے فٹنس بہت اچھی ہونی چاہیے۔پروفیشنل کرکٹ جب شروع کی تھی تو تب سے فٹنس کا خیال رکھاہے۔