شکیب الحسن سیلفی لینے والے مداح سے الجھ پڑے، ویڈیو وائرل

• کھیل

بنگلہ دیش کرکٹ ٹیم کے سابق کپتان شکیب الحسن سیلفی لینے والے مداح سے الجھ پڑے۔

سابق بنگلہ دیشی کپتان شکیب الحسن کا شمار بہترین آل راؤنڈر میں ہوتا ہے لیکن ان کی جارح مزاج ہونے کے سبب وہ اکثر تنازعات میں گھرے رہتے ہیں۔

ایسی ہی ایک ویڈیو سوشل میڈیا پر وائرل ہورہی ہے جس میں شکیب الحسن کو غصے میں دیکھا گیا۔

دراصل ڈھاکہ پریمیئر میں شیخ جمال دھانمنڈی کلب اور پرائم بینک کرکٹ کلب کے درمیان میچ سے قبل ایک مداح نے ان سے سیلفی لینے کی درخواست کی۔

شکیب الحسن کوچ محمد صلاح الدین اور سہیل اسلام سے گفتگو کررہے تھے کہ مداح ان کے پاس آیا اور سیلفی لینے کی درخواست کی، گفتگو میں رکاوٹ شکیب برداشت نہ کرسکے اور فون چھینتے ہوئے اسے مارنے کی دھمکی دی۔

اس سے قبل آئی سی سی ورلڈ کپ 2023 میں وہ سری لنکا کے اینجلو میتھیوز کو ٹائم آؤٹ کرنے کی اپیل کی وجہ سے شہ سرخیوں میں رہے تھے جس میں انہیں تنقید کا نشانہ بنایا گیا تھا۔

اس واقعے کے بعد میتھیوز کے بھائی ٹریون میتھیوز نے یہاں تک کہہ دیا تھا کہ اگر شکیب سری لنکا آئے تو ان پر پتھراؤ کیا جائے گا۔

شکیب الحسن ماضی میں فیصلہ حق میں نہ آنے پر میچ آفیشلز پر غصہ نکال چکے ہیں۔