پاکستان کرکٹ ٹیم کے سابق کپتان شاہد آفریدی نے چیمپئنز ٹرافی کے حوالے سے جاری تنازعہ کے چلتے ایک اہم بیان جاری کر دیا۔  

 شاہد آفریدی نے سوشل میڈیا پر بیان جاری کرتے ہوئے کہا کہ کرکٹ ایک نازک دوراہے پر ہے، شاید 1970 کی دہائی کے بعد سے اب بڑے چیلنج کا سامنا کر رہی ہے۔ 

انہوں نے کہا کہ اس وقت اختلافات کو بھلا کر کھیل کو متحد کرنے کا موقع ہے۔ اگر تاریخ نے دو ممالک کو الگ کیا ہو اور وہ اولمپک اسپرٹ میں اکٹھے ہو سکتے ہیں تو ایسا کرکٹ چیمپئنز ٹرافی میں کیوں نہیں ہو سکتا ؟ 

شاید آفریدی نے کہا کہ  کھیل کے نگران کے طور پر ہم پر فرض ہے کہ اپنی انا کو قابو میں رکھیں، کرکٹ کی ترقی اور اسپرٹ پر فوکس کرنا چاہیے۔

سابق کپتان نے مزید کہا کہ وہ پاکستان میں ہر ٹیم کو چیمپئنز ٹرافی میں دیکھنے کے لیے پر اُمید ہیں،  ساری ٹیمیں ہماری گرم جوشی اور مہمان نوازی کا تجربہ کریں گی اور میدان سے باہر کی ناقابل فراموش یادیں اپنے ساتھ لے کر جائیں گے۔

واضح رہے کہ بھارت نے پاکستان میں ہونے والی چیمپئنز ٹرافی کے لیے اپنی کرکٹ ٹیم بھیجنے سے انکار کردیا ہے۔

ادھر پاکستان کرکٹ بورڈ چیمپئنز ٹرافی کے لیے ہائبرڈ ماڈل قبول نہ کرنے کے اپنے مؤقف پر سختی سے قائم ہے۔

کرکٹ ایسوسی اٖیشن آف دی بلائنڈ انڈیا نے رواں ماہ پاکستان میں کھیلے جانے والے چوتھے ٹی ٹوئنٹی بلائنڈ کرکٹ ورلڈ کپ کیلئے 17 رکنی ٹیم کا اعلان کردیا۔

بی 1 کیٹیگری میں اجے کمار ریڈی، دیبراج بہیرا، نریش بھائی بلو بھائی،نیلیش یادیو، سنجے کمار شاہ، پروین کمار شرما شامل ہیں۔ 

بی 2 کیٹیگری میں وینکٹیشورا راؤ ڈنا، پنکج بھوئے، لوکیشا، رمبیر سنگھ اور عرفان دیوان جبکہ بی 3 کیٹیگری میں درگا راؤ ٹومپاکی، سنیل رمیش، سکھرام ماجھی، روی امیتی، دینیش بھائی چامایاڈ بھائی رتوا اور دھنگار گوپو شامل ہیں۔

کرکٹ ایسوسی اٖیشن آف دی بلائنڈ انڈیا کے چیئرمین ڈاکٹر مہانتیش  نے کہا ہے کہ پاکستان اور بھارت کے مابین ہمیشہ کانٹے دار مقابلے ہوتے ہیں۔ بصارت سے محروم کھلاڑیوں کو زیادہ مواقع ملنے چاہئیں۔

انہوں نے کہا کہ بھارتی بلائنڈ ٹیم تین مرتبہ ورلڈکپ جیتنے کا اعزاز رکھتی ہے اور ہم اپنی فتوحات کے سلسلے کو مزید بڑھانے کے لیے پرعزم اور چوتھی جیت کے لیے تیار ہیں۔

ڈاکٹر مہانتیش کاکہنا ہے کہ ورلڈ کپ کیلئے ہمیں وزارتِ کھیل کی جانب سے این او سی جاری ہوچکی ہے تاہم ٹیم کو وزارتِ خارجہ کی منظوری کا انتظار ہے اور ہمیں وہاں سے مثبت جواب کی توقع ہے۔

انہوں نے بتایا کہ منظوری ملنے پر 21 نومبر کو واہگہ بارڈر کے ذریعے پاکستان جائیں گے۔

کرکٹ ایسوسی اٖیشن آف دی بلائنڈ انڈیا کے صدر بُسے گوڑا نے کہا کہ ورلڈکپ کیلئے 27 اکتوبر سے ٹریننگ کیمپ لگایا گیاتھا ،سلیکشن کمیٹی نے دستیاب بہترین کھلاڑیوں کو منتخب کیا ہے جس میں ماضی میں بھارت کی نمائندگی کرنے کا تجربہ ہے۔

واضح رہے کہ بلائنڈ ٹی ٹونٹی ورلڈکپ 23 نومبر سے 3 دسمبر تک پاکستان میں شیڈولڈ ہے۔

پاکستان کرکٹ بورڈ ( پی سی بی) نے چیمپئنز ٹرافی کیلئے بھارت کے پاکستان آنے سے انکار کے بعد انٹرنیشنل کرکٹ کونسل کے سربراہ کو لکھے گئے خط میں اہم سوالات کے جواب مانگ لیے۔ 

 پاکستان کرکٹ بورڈ نے منگل کو چیمپئنز ٹرافی کیلئے بھارت کے پاکستان آنے سے انکار کے بعد انٹرنیشنل کرکٹ کونسل کو خط لکھا۔ 

باخبر ذرائع نے دعویٰ کیا ہے کہ پی سی بی کی جانب سے انٹرنیشنل کرکٹ کونسل کے سربراہ کو لکھے گئے خط میں ابھی صرف چند اہم سوالات کے جواب مانگے گئے ہیں۔

ذرائع کے مطابق پی سی بی نے آئی سی سی سے پوچھا ہے کہ بھارتی کرکٹ بورڈ نے انہیں کب یہ اطلاع دی کہ بھارتی کرکٹ ٹیم پاکستان میں ہونے والی چیمپئنز ٹرافی میں شرکت نہیں کر پائے گی۔

ذرائع کا کہنا ہے کہ  پی سی بی نے یہ سوال بھی کیا ہے کہ کیا بھارتی کرکٹ بورڈ نے آئی سی سی کو اپنے انکار سے تحریری طور پر آگاہ کیا ہے؟، پی سی بی نے اگلا سوال یہ کیا ہے کہ اگر بھارت نے تحریری طور پر پاکستان آنے سے معذرت کی ہے تو اس کی کیا وجوہات بیان کی گئی ہیں؟

ذرائع کے مطابق پی سی بی نے آئی سی سی سے بھارتی کرکٹ بورڈ کی پاکستان آنے سے تحریری معذرت کی کاپی بھی مانگی ہے تا کہ ان وجوہات کا جائزہ لیا جا سکے جن کی بنیاد پر یہ فیصلہ کیا گیا ہے۔

پی سی بی نے آئی سی سی سے یہ سوال بھی پوچھا ہے کہ اس کی جانب سے بھارتی کرکٹ بورڈ کے ٹیم بھیجنے سے انکار پر اس کی جانب سے کیا جواب دیا گیا ہے؟

ذرائع کا کہنا ہے کہ پاکستان کرکٹ بورڈ ان تمام سوالات کے جواب لینے کے بعد قانونی مشورہ کرے گا اور اپنی حکومت سے گائیڈنس لے گا تا کہ آئندہ لائحہ عمل ترتیب دیا جا سکے۔

تاہم ذرائع کا کہنا ہے کہ اگر بھارت واقعی اپنی کرکٹ ٹیم پاکستان نہیں بھیجتا اور آئی سی سی بھارتی انکار کو تسلیم کر لیتا ہے تو پاکستان کسی بھی صورت چیمپئنز ٹرافی کے دوران بھارتی کرکٹ ٹیم کے ساتھ کوئی بھی میچ کسی بھی صورت نہیں کھیلے گی۔

بھارت اور آسٹریلیا کے درمیان بارڈر گواسکر ٹرافی تو 22 نومبر سے شروع ہونے جا رہی ہیں لیکن ٹیسٹ سیریز سے پہلے ہی اس ٹرافی کے ایک پوسٹر نے نئی بحث چھیڑ دی۔

نیوزی لینڈ کے ہاتھوں اپنے ہی گھر میں وائٹ واش ہونے کے بعد بھارتی کرکٹ ٹیم کا اگلا امتحان آسٹریلیا میں ہے جہاں اس نے کینگروز کے خلاف 5 ٹیسٹ میچز پر مشتمل سیریز کھیلنی ہے۔

بھارت کو اگر آئی سی سی ٹیسٹ چیمپئنز شپ کے فائنل میں جگہ بنانی ہے تو یہ سیریز ممکنہ طور پر 1-4 سے جیتنا ہوگی۔

  بارڈر گواسکر ٹرافی شروع ہونے سے قبل سیریز کے آفیشل براڈ کاسٹر کی جانب سے اس سیریز کا ایک پوسٹر جاری کیا گیا جس نے سوشل میڈیا پر نئی بحث چھیڑ دی۔

ہوا کچھ یوں کہ بھارت اور آسٹریلیا سیریز کے آفیشل براڈ کاسٹر( مقامی میڈیا) کی جانب سے سیریز کا پوسٹر جاری ہوا جس میں ایک طرف تو آسٹریلوی کپتان پیٹ کمنز موجود ہیں تو دوسری جانب ویرات کوہلی کی تصویر آویزاں ہے۔

یہ پوسٹر جیسے ہی سوشل میڈیا پر وائرل ہوا تو شائقین کے ذہنوں میں سوال کھڑے ہوگئے کہ کیا روہت شرما آسٹریلیا کے خلاف ٹیسٹ سیریز میں کپتان نہیں بلکہ ویرات کوہلی ہوں گے، کیوں کہ اکثر سیریز کے پوسٹرز میں دونوں ٹیموں کے کپتانوں کی تصویر لگائی جاتی ہے۔

ادھر یہ بھی خبریں ہیں کہ روہت شرما نجی مصروفیات کی وجہ سے آسٹریلیا کے خلاف پہلا ٹیسٹ میچ نہیں کھیلیں گے، لیکن اس حوالے سے کوئی تصدیق نہیں ہوئی۔

سوشل میڈیا سائٹ ایکس پر سیریز کے پوسٹر کو تنقید کا نشانہ بناتے ہوئے ایک بھارتی فین نے لکھا کہ ' اب بھی یقین نہیں آرہا کہ  روہت شرما پوسٹر سے غائب ہیں، وہ ہمارے کپتان ہیں لیکن کرکٹ کے سب سے بڑے برانڈ کی وجہ سے کوہلی کو یہاں جگہ مل گئی'۔

انہوں نے براڈ کاسٹر سے درخواست کی کہ ہمارے کپتان روہت شرما کی تذلیل نہ کریں۔

ایک اور صارف نے لکھا کہ آسٹریلوی میڈیا نے پہلے ٹیسٹ کیلئے کوہلی کوکپتان بنادیا ہے، سیریز کے آفیشل پوسٹر پر کپتان روہت شرما کی تصویر ہی نہیں لگائی۔

دوسری جانب بھارتی میڈیا یہ پورٹ کر رہا ہے کہ اگر کپتان روہت شرما آسٹریلیا کے خلاف پہلا ٹیسٹ نہیں کھیلتے تو ان کی جگہ نائب کپتان جسپریت بمراہ ٹیم کی قیادت کریں گے۔