بھارتی ٹیم کے کپتان روہت شرما کی ویرات کوہلی سے متعلق سوال پر طنزیہ مسکراہٹ کی ویڈیو سوشل میڈیا پر وائرل ہوگئی۔

بھارتی ٹیم نے ٹی 20 ورلڈ کپ 2024 کے لیے 15 رکنی اسکواڈ کا اعلان چند روز قبل کیا روہت شرما ٹیم کی قیادت کریں گے جبکہ مایہ ناز بیٹر ویرات کوہلی بھی اسکواڈ میں شامل ہیں۔

تاہم آئی پی ایل میں ویرات کوہلی کے سلو اسٹرائیک ریٹ کو لے کر بھارتی میڈیا میں چہ مگوئیاں کی جارہی ہیں۔

چیف سلیکٹر اجیت اگرکر اور کپتان روہت شرما نیوز کانفرنس کررہے تھے اس دوران صحافی نے ویرات کوہلی کے سلو اسٹرائیک ریٹ سے متعلق سوال کیا۔

جواب میں روہت شرما طنزیہ انداز میں مسکرا دیے جس کی ویڈیو وائرل ہوگئی، روہت شرما نے مزید کچھ نہیں کہا لیکن چیف سلیکٹر اجیت اگرکر کوہلی کی حمایت میں بول پڑے۔

انہوں نے کہا کہ ہم یہاں پر ویرات کوہلی کے اسٹرائیک ریٹ پر بات نہیں کررہے وہ آئی پی ایل میں زبردست فارم میں ہیں، ورلڈ کپ میں تجربہ اہمیت رکھتا ہے۔

واضح رہے کہ ویرات کوہلی نے ٹی 20 ورلڈ کپ میں 1141 رنز بنا رکھے ہیں ان کا بیٹنگ اوسط 81.50 اور اسٹرائیک ریٹ 131.30 ہے۔

بھارت کا 15 رکنی ورلڈ کپ اسکواڈ:

بھارتی ٹیم کی قیادت روہت شرما کریں گے، دیگر کھلاڑیوں میں ویرات کوہلی، یشسوی جیسوال، سوریا کمار یادیو، رشبھ پنٹ، سنجو سیمسن، ہاردک پانڈیا، رویندرا جڈیجا، شیوم ڈوبے، اکشر پٹیل، کلدیپ یادیو، یزویندر چاہل، ارشدیپ سنگھ، جسپریت بمرا اور محمد سراج شامل ہیں۔

ریزرو کھلاڑیوں میں رنکو سنگھ، شبھمن گل، خلیل احمد اور اویش خان شامل ہیں۔

 نیوزی لینڈنے ٹی ٹوئنٹی ورلڈ کپ کیلئے سکواڈ کا اعلان کر دیا

نیوزی لینڈ کرکٹ نے انٹرنیشنل کرکٹ کونسل (آئی سی سی) ٹی ٹوئنٹی ورلڈ کپ 2024ء کے لیے سکواڈ کا اعلان کر دیا۔ 

 کین ولیمسن ٹیم کی قیادت کریں گے وہ چوتھے ٹی ٹوئنٹی ورلڈ کپ میں ٹیم کی قیادت کر رہے ہیں۔

 ایڈم ملن ٹخنے کی سرجری کے باعث اسکواڈ میں شامل نہیں ہیں اور کائل جیمیسن کمر کی انجری کے ری ہیب کی وجہ سے دستیاب نہیں ہیں۔

 ٹی ٹوئنٹی ورلڈ کپ کے لیے نیوزی لینڈ کے اسکواڈ میں فن ایلن، ٹرینٹ بولٹ، مائیکل بریسویل، مارک چیپمین، ڈیون کانوے، لوکی فرگوسن، میٹ ہنری اور ڈیرل مچل شامل ہیں۔

 اس کے علاوہ جیمی نیشم، گلین فلپس، راچن رویندرا، مائیکل سینٹنر، ٹم ساؤتھی اور ایش سوڈھی بھی سکواڈ کا حصہ ہیں۔

 ورلڈ کپ کے لیے نیوزی لینڈ کے اسکواڈ میں بین سیئرز کو ٹریولنگ ریزرو کے طور پر شامل کیا گیا ہے۔

 

عوامی سہولت،ٹریفک کی موثرروانی اور آگاہی کیلئے ٹریفک پلان جاری کیا گیا۔سی ٹی او کے مطابق 3ایس پیز، 12 ڈی ایس پیز،140 انسپکٹرز فرائض سرانجام دیں گے، قذافی سٹیڈیم،ٹیموں کے روٹس ،متبادل راستوں پر ایک ہزار سے زائد وارڈنز تعینات ہوں گے۔
رانگ پارکنگ کے خاتمے کیلئے 20 فورک لفٹرز، 5بریک ڈاؤنز بھی تعینات ہونگے۔شائقین کرکٹ کی سہولت اور باآسانی اسٹیڈیم تک رسائی کیلئے 3 پارکنگ سٹینڈز مختص کر دیے گئے۔
سی ٹی او عمارہ اطہر کے مطابق سٹی ٹریفک پولیس روائتی انداز میں شائقین کرکٹ کو خوش آمدید کہے گی، مال روڈ، کینال روڈ، جیل روڈ،مین بلیوارڈ روڈ گلبرگ ٹریفک کیلئے کھلی رہیں گی۔
میچ کے دوران کسی بھی روڈ کو ٹریفک کیلئے بند نہیں رکھا جائے گا،ٹیم کی موومنٹ کے دوران روڈز کو کچھ لمحوں کےلئے بند کیا جائے گا۔
موومنٹ گزرتے ہی تمام ڈائیورشن کو ٹریفک کےلئے کھول دیا جائےگا، شائقین کرکٹ براستہ فیروز پور گورنمنٹ کالج فار بوائز میں پارکنگ کرسکیں گے۔شہری براستہ سینٹر پوائنٹ گورنمنٹ کالج فار بوائز میں گاڑیاں پارک کر سکیں گے۔شائقین کرکٹ سن فورٹ ہوٹل اور لبرٹی مارکیٹ میں گاڑیاں پارک کر سکیں گے۔
 سی ٹی او نے کہا ہے کہ پارکنگ اور سٹیڈیم میں داخلے کیلئے ٹریفک کے عملے سے رہنمائی لیں۔

اسٹار انگلش فاسٹ بولر جوفرا آرچر نے کہا ہے کہ وہ ورلڈکپ کھیلنا چاہتے ہیں جبکہ وہ مزید انجریز سے نمٹنے کے قابل نہیں ہیں۔

آرچر 2019 میں بین الاقوامی ڈیبیو کرنے کے بعد سے فٹنس مسائل کے ساتھ جدوجہد کرتے رہے ہیں، تاہم اب وہ صحتیاب ہورہے ہیں اور جون میں امریکا اور اپنے آبائی علاقے کیریبین جزائر میں ہونے والے ٹی ٹوئنٹی ورلڈ کپ کھیلنے کا ارادہ رکھتے ہیں۔

آخری بار 11 ماہ قبل انٹرنیشنل کرکٹ کھیلنے والے فاسٹ بولر کو اب بھی یقین نہیں کہ وہ میگا ایونٹ میں حصہ لے پائیں گے یا نہیں، وہ دائیں کہنی میں بار بار ہونے والے اسٹریس فریکچر کی وجہ سے مسابقتی کرکٹ سے باہر ہوئے تھے۔

آرچر نے کہا کہ ایمانداری کی بات ہے مجھے نہیں معلوم کہ مجھے مزید کتنا انتظار کرنا پڑیگا، میں نے کافی عرصے سے کرکٹ نہیں کھیلی۔ پچھلے سال میں نے جنوری سے مئی تک کرکٹ کھیلی تھی۔

فاسٹ بولر نے کہا کہ میں واقعی میں ٹیم میں رہنا چاہتا ہوں۔ میں پرانے گھر میں واپس کھیلنا چاہتا ہوں۔ میں اس سال انگلینڈ کے لیے نہیں کھیلا، لہذا میں سمجھتا ہوں کہ اگر ورلڈکپ کھیلوں تو یہ واقعی بہت اچھا ہوگا۔

انگلینڈ نے ان کے لیے محتاط رویہ اپناتے ہوئے انھیں انڈین پریمیئر لیگ (آئی پی ایل) کھیلنے سے روک دیا جبکہ انھیں اگلے سال تک ٹیسٹ کرکٹ سے بھی باہر رکھا گیا ہے۔

جوفرا کو انگلش ٹیم ٹی ٹوئنٹی ورلڈکپ میں اتارنے کا ارادہ رکھتی ہے جہاں وہ ویسٹ انڈیز اور امریکا میں ہونے والے ایونٹ میں اپنے اعزاز کا دفاع کرے گی۔