انٹربینک میں پاکستانی روپےکے مقابلے میں آج ڈالرکا بھاؤ 6 پیسے مہنگا ہوا ہے۔
اسٹیٹ بینک آف پاکستان کے مطابق انٹربینک تبادلہ میں کاروبار کے اختتام پر ڈالرکا بھاؤ 278 روپے17 پیسے ہے۔
انٹربینک میں اس سے قبل ڈالرکا بھاؤ 278 روپے 11 پیسے پر بند ہوا تھا، انٹربینک میں ڈالر آج 6 پیسے مہنگا ہوا ہے۔
دوسری جانب اوپن مارکیٹ میں ڈالرکا بھاؤ 280 روپے 50 پیسے پر برقرار ہے۔
عالمی معیشت کے لیے اہم آبی گزر گاہ سویز کنال کی آمدنی کم ہو گئی۔
حوثیوں کے حملوں کے نتیجے میں نہر سویز کی آمدنی میں نمایاں کمی آئی ہے۔ نہر سویز کی سالانہ آمدنی میں اس کے تازہ ترین مالی سال میں تقریباً ایک چوتھائی کی کمی واقع ہوئی کیونکہ یمن میں حوثیوں کے حملوں نے کچھ شپنگ کمپنیوں کو متبادل راستے اختیار کرنے پر مجبور کیا ہے۔
رائٹرز کے مطابق مصری کینال اتھارٹی کے سربراہ اسامہ ربی نے کہا کہ اس کے مالی سال 2023-24 میں آمدنی 7.2 بلین ڈالر تک گر گئی جو پچھلے سال 9.4 بلین ڈالر تھی۔
ربی نے کہا کہ نہر استعمال کرنے والے جہازوں کی تعداد 2023-24 میں کم ہو کر 20,148 ہو گئی جو ایک سال پہلے 25,911 تھی۔
ایران سے منسلک حوثییوں نے وعدہ کیا ہے کہ اسرائیل سے منسلک بحری جہازوں کے خلاف ان کے حملے اس وقت تک جاری رہیں گے جب تک اسرائیل غزہ پر اپنی جنگ بند نہیں کر دیتا۔
نہر سویز مصر کی ایک سمندری گذرگاہ ہے جو بحیرہ روم کو بحیرہ قلزم سے ملاتی ہے۔ اس کے بحیرہ روم کے کنارے پر پورٹ سعید اور بحیرہ قلزم کے کنارے پر سوئز شہر موجود ہے۔ یہ نہر 163 کلومیٹر (101 میل) طویل اور کم از کم 300 میٹر چوڑی ہے۔
گوجرانوالہ: وائلڈ لائف نے ایکشن لیتے ہوئے ہرن کا شکار کرکے اسے آئن لائن فروخت کرنے والے ملزمان کو گرفتار کرلیا۔
وائلڈ لائف ہرن کا شکارکرکے آئن لائن فروخت کرنے والوں کیخلاف سرگرم ہوگئی، محکمہ وائلڈ لائف نے گوجرانوالہ میں نوشہرہ روڈ محلہ مومن پورہ میں کارروائی کرتے ہوئے ملزمان کو پکڑا۔
محکمہ وائلڈ لائف کے صوبائی اسکواڈ اور لوکل ٹیم نے گاہک بن کرکارروائی کی، کارروائی میں شکاریوں سے ذبح شدہ نرپارہ ہرن برآمد کرلیے گئے۔
ڈپٹی ڈائریکٹر محکمہ وائلڈ لائف نے بتایا کہ نرپارہ ہرن فروخت کرنے والے 2 ملزمان کو گرفتار کرلیا گیا ہے۔
ملزمان کیخلاف وائلڈلائف ایکٹ کے تحت کارروائی کا آغاز کردیا گیا ہے، ڈپٹی ڈائریکٹر نے بتایا کہ ٹیم کو دھمکیاں، کارسرکار میں مداخلت پر ملزمان کے خلاف تھانہ باغبانپورہ میں بھی مقدمہ درج کیا گیا ہے۔
پنجاب میں 500 یونٹ تک بجلی کے استعمال پر صارفین کو سولر پینلز دینے کے منصوبے کی منظوری دے دی گئی۔
اس حوالے سے وزیراعلیٰ پنجاب مریم نواز نے روشن گھرانہ پروگرام کی منظوری کیلئے کل کابینہ اجلاس بلا لیا ہے۔ پنجاب کابینہ سولر پینلز کی فراہمی کے منصوبے کی کل باضابطہ منظوری دے گی۔
پنجاب حکومت 50 سے 500 یونٹ بجلی استعمال پر کروڑوں صارفین کو سولر سسٹم دے گی۔ سولر پینل کی لاگت کا 90 فیصد پنجاب حکومت اداکرے گی جب کہ 10 فیصد صارف دے گا۔
سولر پینل 5سال کی آسان اقساط پر صارفین کو فراہم کیے جائیں گے۔ سردیوں میں سولر پینل کی قسط نسبتاً کم ہوگی، پینل صرف حکومت دےگی۔
صارف کی ضرورت کے مطابق سرکاری بجلی، سولر پینل سے حاصل بجلی میں شرح کا تعین بھی ہو سکے گا۔ بجلی مہنگی ،توانائی بحران کے پیش نظر ’روشن گھرانہ‘ پروگرام شروع کرنے کا فیصلہ کیا گیا۔
شفاف طریقہ کار کے مطابق پہلےمرحلے میں غریب گھرانوں کو سولر سسٹم دئیےجائیں گے۔ وزیراعلیٰ پنجاب مریم نوازشریف کا کہنا ہے کہ عوام کو مشکل حالات میں تنہا نہیں چھوڑیں گے ماضی کی تباہی کے اثرات سے عوام کو بچانےکی کوششیں کر رہے ہیں، 5سال بعد عوام کو موجودہ مسائل کا سامنا نہیں ہو گا۔
کراچی: ملک میں سونے کی فی تولہ قیمت میں آج بھی سینکڑوں روپے کا اضافہ ہوا ہے۔
آل پاکستان جیمز اینڈ جیولرز ایسوسی ایشن کے مطابق 1100 روپے اضافے کے بعد سونے کی فی تولہ قیمت 2 لاکھ 44 ہزار 400 روپے ہو گئی ہے۔
ایسوسی ایشن کا کہنا ہے کہ 10 گرام سونے کی قیمت بھی 944 روپے اضافے سے 2 لاکھ 9 ہزار 534 روپے کی سطح پر آگئی ہے۔
آل پاکستان جیمز اینڈ جیولرز ایسوسی ایشن کا کہنا ہے کہ عالمی مارکیٹ میں 9 ڈالر اضافے سے فی اونس سونا 2364 ڈالر کا ہوگیا۔
پاکستان پیٹرولیم ڈیلرز ایسوسی ایشن نے 5 جولائی کو ملک بھر میں پمپس بند کرنے کا اعلان کردیا۔
اے آر وائی نیوز کے مطابق چیئرمین پیٹرولیم ڈیلرز ایسوسی ایشن عبدالسمیع خان نے کہا کہ 5 جولائی کو ملک بھر میں پمپ بند کرکے ہڑتال کریں گے، مجبور ہیں پہلے ہی بہت سے ٹیکسز ادا کررہے ہیں، دنیا میں کوئی ایسا طریقہ نہیں کہ نقصان میں پمپ چلائے جائیں۔
انہوں نے کہا کہ حکومت فوری طور پر ایڈوانس ٹیکس کا فیصلہ واپس لے، بجٹ میں 0.5 فیصد ایڈوانس ٹیکس ٹرن اوور ٹیکس لگایا گیا ہے یہ ٹیکس پیٹرول پمپ کے کاروبار کو تباہ کردے گا۔
عبدالسمیع خان نے کہا کہ پہلے ہی کم سے کم منافع کے ساتھ پیٹرول پمپس چلا رہے ہیں، مہنگائی کی بلند ترین شرح میں کاروبار کو چلانا پہلے ہی مشکل ہے، غیرمنصفانہ ٹیکس کی وجہ سے کاروبار بند کرنے کے سوا کوئی چارہ نہیں۔
انہوں نے کہا کہ وزیر خزانہ سے ملاقات کی، ان کے پاس ہمارے سوالوں کا جواب نہیں، ایڈوانس انکم ٹیکس چار دن میں ختم کیا جائے، واضح طور پر بتایا ہے کہ سخت سے سخت قدم اٹھائیں گے۔
واضح رہے کہ گزشتہ دنوں پیٹرولیم ڈیلرز ایسوسی ایشن کی جانب سے پیٹرول پمپس بند کرنے کی دھمکی دی گئی تھی۔
اسلام آباد : وزیراعظم شہباز شریف نے سولر پینل لگانے والوں کو نئی ڈیوٹی کے حوالے سے بڑی خوشخبری سنادی۔
تفصیلات کے مطابق وزیراعظم شہباز شریف کی زیر صدارت وفاقی کابینہ اجلاس کااعلامیہ جاری کردیا گیا ، جس میں شہباز شریف نے بتایا کہ سولر پینلز پر کسی قسم کی نئی ڈیوٹی نہیں لگائی جائے گی۔
وزیراعظم کا کہنا تھا کہ عام آدمی کی قابل تجدیدشمسی توانائی تک رسائی یقینی بنائی جائے گی، کم لاگت قابل تجدیدشمسی توانائی ہر شہری تک پہنچائیں گے۔
انھوں نے بتایا کہ معیشت کومثبت سمت پرگامزن کرنے کیلئےبھرپورمنصوبہ بندی کررہےہیں، اللہ کے فضل سے ملک معاشی استحکام کی جانب تیزی سے بڑھ رہا ہے، چھوٹے اور درمیانے درجے کی صنعت کو ترقی دے کر برآمدات میں اضافہ کریں گے۔
وزیراعظم نے مزید بتایا کہ اشرافیہ اور ملکی وسائل کا استحصال کرنے والوں کی مراعات کو ختم کیا جائے گا، عام آدمی کے معاشی تحفظ اوریکساں ترقی فراہم کرنا حکومت کی اولین ترجیح ہے۔
وفاقی کابینہ میں قومی اقتصادی کونسل کی سالانہ رپورٹ 23-2022 پارلیمنٹ میں پیش کرنے کی اجازت دینے کی منظوری دے دی گئی۔
اس کے ساتھ ہی اقتصادی رابطہ کمیٹی کے13 جون کےاجلاس میں کیے گئے فیصلوں ، کابینہ کمیٹی برائےلیجسلیٹوکیسزکے11جون کے اجلاس کے فیصلوں اور کابینہ کمیٹی برائےسرکاری ملکیتی ادارےکے 20 جون کےاجلاس کے فیصلوں کی توثیق کی گئی۔
سینیٹ اجلاس میں اظہار خیال کرتے ہوئے سلیم مانڈوی والا نے کہا ہے کہ 18.9 کھرب کے بجٹ میں 9 کھرب سے زائد سود کی ادائیگی میں جاتے ہیں۔
سلیم مانڈوی والا نے سینیٹ فنانس قائمہ کمیٹی کی سفارشات پیش کیں، ان کا کہنا تھا کہ 2.4 ملین نان فائلرز کو کوئی نہیں پوچھ رہا، بڑے سیٹھوں اور مالدار افراد پر بھی کوئی ہاتھ نہیں ڈالتا، قائمہ کمیٹی نے متفقہ طور پر ملازمت پیشہ افراد پر ٹیکس اضافے کو مسترد کیا.
سلیم مانڈوی والا نے کہا کہ ہمیں سفارشات کیلئے عموماً 14 دن ملتے ہیں، اس بار 6 ملے، کمیٹی ارکان، سینیٹ عملے اور مختلف وزارتوں کے حکام نے بہت تعاون کیا، 32 اسٹیک ہولڈرز نے کمیٹی میں نمائندگی کی، سفارشات پیش کیں
انھوں نے کہا کہ نوزائیدہ بچوں کے دودھ پر ٹیکس اضافے کو بھی یکسر مسترد کیا گیا ہے، کمیٹی نے معذور افراد سے متعلق حکومت سے مل کر مسائل کے حل کی سفارش کی۔
سلیم مانڈوی والا نے کہا کہ قائمہ کمیٹی نے پولٹری فیلڈ پر ٹیکس سے متعلق حکومت سے نظرثانی کی سفارش کی ہے۔
قائمہ کمیٹی نے کہا کہ سفارش جو اسپتال مریضوں سے پیسے نہیں لیتے انھیں مراعات دی جائیں، جواسپتال مریضوں سے پیسے لیتے ہیں ان کو مراعات نہ دیں۔
انھوں نے بتایا کہ قائمہ کمیٹی نے سستے موبائل فون پر ٹیکس مسترد، ختم کرنے کی سفارش کی ہے، پہلی بار اسکول کے بچوں کی پنسل، ربڑ، کاغذ پر ٹیکس لگایا گیا جسے کمیٹی نے مسترد کیا۔
