چیٹ جی پی ٹی جیسے مقبول ترین آرٹی فیشل انٹیلی جنس (اے آئی) چیٹ بوٹ تیار کرنے والی کمپنی کے چیف ایگزیکٹو سام آلٹمین نے 2025 کے حوالے سے اہم پیشگوئی کی ہے۔

اوپن اے آئی کے چیف ایگزیکٹو نے پیشگوئی کی کہ 2025 میں اے آئی ایجنٹس ورک فورس کا حصہ بن جائیں گے۔

انہوں نے کہا کہ یہ اے آئی ایجنٹس خودکار طور پر فیصلہ کرنے کے قابل ہوں گے، اپنے مقاصد خود طے کرسکیں گے اور کم از کم انسانی مداخلت کے ساتھ اپنے کاموں کو مکمل کرسکیں گے۔

ایک بلاگ پوسٹ میں سام آلٹمین نے اے آئی کے مستقبل اور انسانی ذہانت جیسے آرٹی فیشل جنرل انٹیلی جنس (اے جی آئی) کے بارے میں اپنے خیالات کا اظہار کیا۔

انہوں نے کہا کہ 'ہمارا ماننا ہے کہ 2025 میں ہم ایسے اولین اے آئی ایجنٹس کو دیکھ سکتے ہیں جو افرادی قوت کا حصہ بن جائیں گے اور کمپنیوں کی پیداواری گنجائش کو نمایاں حد تک بدل دیں گے، اے آئی میں پیشرفت میں متعدد نشیب و فراز دیکھنے میں آئے ہیں اور مستقبل میں ایسا مزید ہوگا'۔

انہوں نے کہا کہ اوپن اے آئی اے جی آئی کی تیاری کے حوالے درست سمت میں آگے بڑھ رہی ہے۔

اے جی آئی ایسا سسٹم ہوگا جو انسانی ذہانت کے برابر یا اس سے بھی زیادہ اسمارٹ ہوگا۔

اوپن اے آئی کے چیف ایگزیکٹو نے گزشتہ 2 برسوں کے دوران اپنی کمپنی کی کامیابیوں اور چیلنجز پر بھی بات کی۔

انہوں نے کہا کہ اوپن اے آئی بہت زیادہ ذہین اے آئی سسٹمز پر کام کرنے کی جانب بڑھ رہی ہے، یہ ایسے سسٹمز ہوں گے جو ذہانت کے لحاظ سے انسانوں کو پیچھے چھوڑ دیں گے اور ان کی بدولت سائنس کے شعبے میں تیزی سے پیشرفت ہوگی۔

ان کا کہنا تھا کہ یہ سسٹم کچھ بھی کرنے کے قابل ہوں گے۔

انہوں نے مزید کہا کہ یہ ٹولز سائنسی دریافتوں کی رفتار کو بہت زیادہ تیز کر دیں گے جس سے دنیا کی خوشحالی میں اضافہ ہوگا۔

خیال رہے کہ بلومبرگ کی ایک رپورٹ کے مطابق اوپن اے آئی کی جانب سے جنوری 2025 میں آپریٹر نامی اے آئی ایجنٹ جاری کیا جار ہا ہے۔

یہ نیا اے آئی ایجنٹ کوڈنگ اور ٹریول بکنگ جیسے کام صارف کی جانب سے خود کرسکے گا۔

اسلام آباد: وزیر مملکت برائے انفارمیشن ٹیکنالوجی شزا فاطمہ خواجہ کا کہنا ہے کہ سیٹلائٹ انٹرنیٹ فراہم کرنے والی کمپنی ’اسٹارلنک‘ سکیورٹی ایکسچینج کمیشن آف پاکستان (ایس ای سی پی) میں رجسٹر ہوچکی ہے۔

جیو نیوز سے بات کرتے ہوئے شزا فاطمہ خواجہ نے کہا کہ کمپنی کی ایس ای سی پی میں رجسٹریشن ہوچکی ہے اور اب ریگولیٹری فریم ورک کی تیاری جاری ہے۔

حکام کا کہنا ہے کہ نان اسٹیشنری اور نان جورسڈیکشنل لو ارتھ آربٹس کے حوالے سے ریگولیٹری فریم ورک کی تیاری میں غیر ملکی ماہرین سے بھی مشاورت جاری ہے۔

حکام کا بتانا ہے کہ یہ سیٹلائٹس مقامی فریکوئنسیز  میں خلل ڈال سکتی ہیں جس وجہ سے ایک جامع پالیسی تیار کی جارہی ہے جو تمام پہلوؤں کا احاطہ کرے۔

خیال رہے کہ پاکستان میں اسٹارلنک انٹرنیٹ سروس لینے سے متعلق حکومتی فیصلے پر گزشتہ روز  ایلون مسک کا ردعمل سامنے آیا تھا۔

پاکستانی سوشل میڈیا صارف کے خیرمقدمی بیان پر ٹیسلا اور اسپیس ایکس کے سی ای او ایلون مسک نےکہا تھا کہ اسٹار لنک سروس کے لیے حکومت پاکستان کی منظوری کے منتظر ہیں۔

واضح رہے کہ گزشتہ ماہ سینیٹ کی قائمہ کمیٹی برائے آئی ٹی اینڈ ٹیلی کام کے اجلاس میں وزیر مملکت برائے انفارمیشن ٹیکنالوجی شزا فاطمہ نےکہا تھا کہ ہم کوشش کر رہے ہیں کہ ایلون مسک کی سیٹلائٹ کمپنی اسٹار لنک کو پاکستان لے آئیں۔

اگر آپ 10 سال پرانا اینڈرائیڈ فون استعمال کررہے ہیں تو بہتر ہے کہ اسے بدل لیں ، ورنہ یکم جنوری 2025 سے واٹس ایپ استعمال کرنا ممکن نہیں ہوگا۔

جی ہاں میٹا نے پرانے اینڈرائیڈ فونز کے لیے واٹس ایپ سپورٹ ختم کرنے کا فیصلہ کیا ہے۔

خاص طور پر وہ اسمارٹ فونز جو اینڈرائیڈ کٹ کیٹ (اینڈرائیڈ 4.4) پر چل رہے ہیں۔

ایک رپورٹ کے مطابق اینڈرائیڈ کٹ کیٹ یا اس سے پہلے کے آپریٹنگ سسٹم ورژنز پر چلنے والے اسمارٹ فونز میں یکم جنوری سے واٹس ایپ تک رسائی ممکن نہیں ہوگی۔

واٹس ایپ کی جانب سے یوزر انٹرفیس اور پرائیویسی سیٹنگز کو مسلسل بہتر کیا جاتا ہے، جس کے لیے ایسے فیچرز متعارف کرائے جاتے ہیں جو ایپل اور اینڈرائیڈ کے تازہ ترین آپریٹنگ سسٹمز سے مطابقت رکھتے ہوں۔

یہی وجہ ہے کہ کمپنی کی جانب سے پرانے آپریٹنگ سسٹمز کے لیے سپورٹ اکثر ختم کر دی جاتی ہے۔

میٹا کی جانب سے زیادہ جدید فیچرز بشمول آرٹی فیشل انٹیلی جنس (اے آئی) ٹیکنالوجی پر مبنی فیچرز پر کام کیا جا رہا ہے جن کے لیے زیادہ جدید ہارڈ وئیر کی ضرورت ہے۔

اب بھی ایک فیصد کے قریب اینڈرائیڈ اسمارٹ فونز ان پرانے آپریٹنگ سسٹمز پر کام کرتے ہیں۔

یکم جنوری سے جن پرانے اسمارٹ فونز پر واٹس ایپ استعمال کرنا ممکن نہیں ہوگا ان میں سام سنگ کا گلیکسی ایس 3، ایس نوٹ 2، گلیکسی ایس 3، گلیکسی ایس 4 منی، موٹرولا موٹو جی (فرسٹ جنریشن)، ریزر ایچ ڈی، موٹو ای 2014، ایچ ٹی سی ون ایکس، ون ایکس پلس، ڈیزائر 500 اور ڈیزائر 601 شامل ہیں۔

اسی طرح ایل جی کے آپٹیمس جی، نیکسز 4، جی 2 منی اور ایل 90 جبکہ سونی کے ایکسپیریا زی، ایکسپیریا ایس پی، ایکسپیریا ٹی اور ایکسپیریا وی اسمارٹ فونز بھی واٹس ایپ سے محروم ہو جائیں گے۔

اگر آپ ان پرانے اسمارٹ فونز کو استعمال کر رہے ہیں تو آپ کو اپنا واٹس ایپ ڈیٹا کسی نئی ڈیوائس پر منتقل کرنا ہوگا ورنہ یکم جنوری کے بعد واٹس ایپ کی تمام میڈیا اور چیٹ ہسٹری ڈیلیٹ ہو جائے گی۔

میٹا کی جانب سے کچھ عرصے قبل اسی طرح کا اعلان آئی فونز کے لیے بھی کیا گیا تھا۔

کمپنی کی جانب سے پرانے آئی او ایس ورژنز پر چلنے والے آئی فونز کے لیے واٹس ایپ سپورٹ ختم کی جا رہی ہے اور مئی 2025 سے صرف آئی او ایس 15.1 پر کام کرنے والے آئی فونز پر ہی اس میسجنگ ایپ کو استعمال کرنا ممکن ہوگا۔

گوگل کے چیف ایگزیکٹو سندر پچائی نے کہا ہے کہ ان کی کمپنی کا سرچ انجن (گوگل) 2025 میں نمایاں حد تک بدل جائے گا۔

ایک کانفرنس کے موقع پر سندر پچائی نے کہا کہ 'میرے خیال میں ہم گوگل سرچ میں بہت زیادہ پیچیدہ سوالات کے جواب بھی دے سکیں گے'۔

انہوں نے بتایا کہ 'میرے خیال میں آپ حیران رہ جائیں گے، یہاں تک کہ 2025 کے شروع میں بھی سرچ میں کافی کچھ نیا کرنا ممکن ہوگا'۔

انہوں نے مزید بتایا کہ 'جب میں مستقبل کی جانب دیکھتا ہوں تو اندازہ ہوتا ہے کہ ہم بہت بڑی تبدیلی کے ابتدائی مراحل سے گزر رہے ہیں، میرے خیال میں آگے کافی تنوع دیکھنے میں آئے گا، ہم اس شعبے میں سب سے آگے رہنے کے لیے پرعزم ہیں اور میرے خیال میں ابھی بھی ہم سب سے آگے ہیں'۔

خیال رہے کہ گوگل نے 2024 میں اپنے سرچ انجن آرٹی فیشل انٹیلی جنس (اے آئی) ٹیکنالوجی سے متعلق کافی کچھ شامل کیا ہے۔

مثال کے طور پر اے آئی سرچ سمریز کا اضافہ کیا گیا ہے جبکہ گوگل لینس کو اپ ڈیٹ کیا گیا ہے تاکہ آپ ویڈیوز کے مواد کو ویب ورژن پر سرچ کرسکیں۔

کمپنی کی جانب سے جیمنائی ماڈل میں ایک بڑی اپ ڈیٹ کرنے کی تیاری بھی کی جا رہی ہے تاکہ وہ مائیکرو سافٹ اور اوپن اے آئی کا مقابلہ کرسکے۔

خیال رہے کہ ستمبر 2023 کو ایک بلاگ پوسٹ میں سندر پچائی نے اے آئی ٹیکنالوجی کو حالیہ عرصے کی اہم ترین پیشرفت قرار دیا تھا۔

انہوں نے کہا کہ اے آئی ہماری زندگی میں ہونے والی سب سے بڑی ٹیکنالوجی پیشرفت ثابت ہوگی اور یہ انٹرنیٹ سے بھی بڑی ہو سکتی ہے۔

سندر پچائی نے بلاگ پوسٹ میں کہا کہ اے آئی ٹیکنالوجی کی دنیا کو بدل کر رکھ دے گی جبکہ اس سے انسانی اختراع کا عمل تیز ہوگا۔

انہوں نے کہا کہ اے آئی کو ہر فرد کے لیے مددگار بنانا اور ذمہ داری سے اس کا پھیلاؤ اگلے 10 برس کے لیے ہمارا اہم ترین کام ہے۔