ویسے تو کہا جاتا ہے کہ ویڈیو گیمز کھیلنے کی عادت جسمانی اور ذہنی صحت کے لیے نقصان دہ ہوتی ہے۔

مگر ایک نئی طبی تحقیق میں دعویٰ کیا گیا ہے کہ ویڈیو گیمز کھیلنے سے ذہنی افعال بہتر ہوتے ہیں مگر دماغی صحت پر کوئی اثرات مرتب نہیں ہوتے، جبکہ ورزش کرنے سے دماغی صحت کو فائدہ ہوتا ہے مگر ذہنی افعال پر کوئی اثرات مرتب نہیں ہوتے۔

کینیڈا کی ویسٹرن یونیورسٹی کی اس تحقیق میں دنیا بھر سے 2 ہزار سے زائد افراد کو شامل کیا گیا اور ان کی صحت کا جائزہ لینے کے لیے مختلف سوالنامے بھروائے گئے۔

اس کے بعد انہیں آن لائن دماغی گیمز کھیلنے کا کہا گیا۔

ان گیمز کو ڈیزائن کرنے کا مقصد دماغی افعال کے مختلف پہلوؤں جیسے یاداشت، توجہ، منطق اور دیگر کی جانچ پڑتال کرنا تھا۔

تحقیق میں شامل ایک ہزار کے قریب افراد نے تمام ٹاسکس کو مکمل کرنے میں کامیابی حاصل کی۔

نتائج سے معلوم ہوا کہ ویڈیو گیمز کھیلنے سے ذہنی افعال پر مثبت اثرات مرتب ہوتے ہیں مگر دماغی صحت کو کوئی فائدہ نہیں ہوتا۔

اس کے مقابلے میں ہر ہفتے 150 منٹ تک ورزش کرنے سے دماغی صحت بہتر ہوتی ہے مگر ذہنی افعال پر کوئی اثرات مرتب نہیں ہوتے۔

تحقیق میں یہ بھی دریافت کیا گیا کہ ہر ہفتے 5 گھنٹے یا اس سے زائد وقت تک ایک ہی گیم کو کھیلنے والے افراد کے ذہنی افعال کی عمر اوسطاً 13.7 سال تک کم ہو جاتی ہے۔

اسی طرح ہر ہفتے 5 گھنٹے سے کم وقت تک ہر قسم کی گیمز کھیلنے والے افراد کے ذہنی افعال کی عمر اوسطاً 5.2 سال تک گھٹ جاتی ہے۔

تحقیق کے مطابق ہر ہفتے 150 منٹ تک ورزش کرنے والے افراد میں ڈپریشن سے متاثر ہونے کا خطرہ 12 فیصد تک گھٹ جاتا ہے جبکہ انزائٹی کی علامات کا امکان 9 فیصد تک کم ہو جاتا ہے۔

محققین نے تسلیم کیا کہ یہ تحقیق مشاہداتی تھی اور لوگوں کی جانب سے فراہم کردہ تفصیلات پر انحصار کیا گیا، مگر نتائج سے یہ سمجھنے میں مدد ملتی ہے کہ جسم اور ذہن ایک دوسرے سے جڑے ہوئے ہیں۔

انہوں نے کہا کہ تحقیق کے نتائج سے لوگوں کو ایسی سرگرمیوں کا انتخاب کرنے میں مدد ملے گی جس سے وہ اپنی ذہنی عمر کو صحت مند بنا سکتے ہیں۔

اس تحقیق کے نتائج ابھی کسی طبی جریدے میں شائع نہیں ہوئے بلکہ آن لائن ایک پری پرنٹ سرور پر جاری کیے گئے۔

پشاور : پاکستان میں منکی پاکس کا دوسرا کیس سامنے آگیا، جس کے بعد خیبرپختونخوا میں رواں سال مریضوں کی تعداد 2ہوگئی۔

تفصیلات کے مطابق پاکستان میں منکی پاکس کا دوسرا کیس رپورٹ ہوا، ڈائریکٹرپبلک ہیلتھ ڈاکٹر ارشاد علی نے صوبے میں ایم پاکس کا دوسرا کیس کنفرم کرلیا ہے۔

نوشہرہ سےتعلق رکھنےوالے47 سالہ شہری میں ایم پاکس کی تصدیق ہوئی، ڈاکٹر ارشاد علی نے بتایا کہ خیبرپختونخوا میں رواں سال ایم پاکس مریضوں کی تعداد 2 ہوگئی۔

ان کا کہنا تھا کہ مریض دبئی سےپشاور آرہاتھا، ایئر پورٹ پر تعینات ٹیم نے اسکریننگ کی تاہم مزیدریسرچ کیلئے نمونے این آئی ایچ اسلام آباد بھجوائے گئے ہیں۔

ڈائریکٹرپبلک ہیلتھ نے کہا کہ 3 سے 4 دن میں رپورٹ آنے کے بعد شیئر کی جائے گی۔

یاد رہے 19 اگست کو اسلام آباد انٹرنیشنل ایئرپورٹ پر ایم پاکس کا ایک مشتبہ کیس رپورٹ ہوا تھا، مشتبہ مریض کا تعلق آزاد کشمیر سے تھا۔

اسکریننگ کے دوران مشتبہ مریض کے سینے پر نشانات پائے گئے ہیں تاہم بعد ازاں مشتبہ مریض کا ٹیسٹ منفی آیا تھا۔

واضح رہے کہ ملک بھر میں ایم پاکس کے 12 کیسز رپورٹ ہوچکے ہیں، پہلا کیس پشاور میں رپورٹ ہوا، مردان میں بھی ایم پاکس کا کیس سامنے آیا تھا جبکہ پنجاب اور خیبرپختونخوا میں 4،4 جبکہ اسلام آباد، بلوچستان اور سندھ میں ایک ایک کیس رپورٹ ہوا ہے۔

مشتبہ مریض میں منکی پاکس وائرس کی تصدیق ہوگئی، مریض میں خطرناک بیماری کی تصدیق خیبرمیڈیکل یونیورسٹی پشاور نے کی۔

تفصیلات کے مطابق ذرائع وزارت صحت نے بتایا کہ متاثرہ مریض میں منکی پاکس کی تصدیق خیبر میڈیکل یونیورسٹی پشاور نے کی ہے، منکی پاکس پازیٹو مریض کی عمر 34 سال ہے اور وہ مردان کا رہائشی ہے۔

منکی پاکس کا مریض رواں مہینے 3 اگست کو سعودی عرب سے باچا خان ایئرپورٹ پشاور پہنچا، منکی پاکس کا مریض پشاور ایئرپورٹ سے گھرچلا گیا تھا۔

ذرائع وزارت صحت نے بتایا کہ مریض نے منکی پاکس علامات ظاہر ہونے پر محکمہ صحت سے رابطہ کیا، 34 سالہ مریض میں 13 اگست کو منکی پاکس کی تصدیق ہوئی ہے۔

منکی پاکس مریض کے قریبی افراد کی کونٹیکٹ ٹریسنگ کا عمل جاری ہے، متاثرہ مریض کے ساتھ فلائٹ میں آنے والوں کی بھی کونٹیکٹ ٹریسنگ جاری ہے۔

کراچی کے مختلف علاقوں میں کہیں تیز اور ہلکی بارش کے بعد موسم خوشگوار ہوگیا۔

اے آر وائی نیوز کے مطابق کراچی کے علاقے گلشن اقبال، گلستان جوہر، فیڈرل بی ایریا، لیاقت آباد، کریم آباد، نارتھ ناظم آباد میں تیز بارش ہوئی ہے۔

ادھر لانڈھی، کورنگی، قائد آباد اور ملیر میں بھی ہلکی بارش ریکارڈ کی گئی ہے۔

شاہراہ فیصل، گرومندر، سندھی مسلم سوسائٹی، جمشید کوارٹر میں بھی ہلکی بارش ہوئی جبکہ لیاری ایکسپریس وے پر موسلا دھار بارش ریکارڈ کی گئی۔

ترجمان کے الیکٹرک

کے الیکٹرک ترجمان کا کہنا ہے کہ بارش کے موسم میں شہری برقی آلات کے استعمال میں احتیاط کریں۔

ترجمان کا کہنا ہے کہ پانی کی موٹر جیسے برقی آلات کا غیر محفوظ استعمال حادثات کا سبب بن سکتا ہے، شہری ٹی وی، انٹرنیٹ کیبلز، ٹوٹے ہوئے تاروں، بجلی کی تنصیبات سے فاصلہ رکھیں۔

کے الیکٹرک کا کہنا ہے کہ غیر قانونی ذرائع سے بجلی کا حصول، کنڈے جان لیوا حادثات کا سبب بنتے ہیں۔

ترجمان کے الیکٹرک کا کہنا ہے کہ نشیبی علاقوں میں پانی جمع ہونے پر حفاظتی اقدام کے تحت عارضی طور پر بجلی بن کی جاسکتی ہے، صورتحال کا جائزہ لے رہے ہیں اور فیلڈ اسٹاف الرٹ ہے۔