امریکی میگزین نے سال 2024 کے پرکشش مرد کا اعلان کر دیا۔
غیر ملکی میڈیا رپورٹس کے مطابق امریکا کے معروف میگرین 'People magazine’ نے امریکی اداکار جان کراسنسکی کو 2024 کا پرکشش مرد قرار دیا ہے۔
امریکی میگزین کی جانب سے اس سال کے پرکشش مرد کے ٹائٹل کا اعلان گزشتہ رات دی لیٹ شو وِد اسٹیفن کولبرٹ کے دوران کیا گیا۔
45 سالہ جان کراسنسکی 'People magazine’ کی جانب سے 2024 کے پرکشش مرد کا اعزاز حاصل کرنے پر خوش ہونے کے ساتھ تھوڑے حیران بھی ہوئے۔
جان کراسنسکی اداکاری کرنے کے ساتھ ہدایتکار بھی ہیں۔انہوں نے برطانوی اداکارہ ایملی بلنٹ سے شادی کی اور جوڑے کے 2 بچے ہیں۔
واضح رہے کہ گزشتہ سال امریکی اداکار پیٹرک ڈیمپسی نے یہ اعزاز حاصل کیا تھا جبکہ بریڈ پِٹ اور مائیکل جارڈن بھی دنیا کے پرکشش مرد قرار دیے جاچکے ہیں۔
معروف گلوکار عاطف اسلم نے سعودی عرب میں کنسرٹ سے متعلق منسوب بیان سے لاتعلقی کا اظہار کردیا۔
قریبی ذرائع کے مطابق عاطف اسلم نے سعودی عرب میں کنسرٹ کرنے یا نہ کرنے سے متعلق کوئی بیان نہیں دیا۔
قریبی ذرائع کا کہنا ہے کہ عاطف اسلم نے ایسا کوئی بیان نہیں دیا کہ وہ سعودی عرب میں کنسرٹ نہیں کریں گے، سوشل میڈیا پر عاطف اسلم سے منسوب زیر بحث بیان سراسر جھوٹ ہے۔
خیال رہے کہ عاطف اسلم ماضی میں سعودی دارالحکومت ریاض میں پرفارم کر چکے ہیں۔
پاکستانی میزبان و اداکارہ مشی خان لائیو شو میں صوفے سے گرپڑیں جس کی ویڈیو سوشل میڈیا پر وائرل ہوگئی۔
مشی خان اپنے شو کے دوران صوفے پر بیٹھ کر سیلفی لینے کی کوشش کررہی تھیں لیکن وہ اپنا توازن برقرار نہ رکھ سکیں اور صوفے سے نیچے آگریں جب کہ اس دوران ان کے ہاتھ میں پکڑا موبائل فون بھی فرش پر گرگیا۔
میزبان کے فرش پر گرنے کے بعد انتظامیہ میں موجود شخص فوری ان کی مدد کو آگیا اور ان کی خیریت دریافت کی جس پر مشی خان صوفے پر بیٹھ کر ہنسنے لگیں۔
خود کو سنبھالنے کے بعد میزبان نے انتظامیہ سے کہا کہ ’آپ لوگ میرے ساتھ جلدی نہ کیا کریں‘۔
اداکارہ کے لائیو شو کے دوران زمین پر گرپڑنے کی ویڈیو سوشل میڈیا پر وائرل ہوگئی ہے جس پر صارفین جہاں اداکارہ سے ہمدردی کا اظہار کررہے ہیں وہیں کچھ صارفین اداکارہ کی سیلفی لینے کی خواہش میں زمین پر گر پڑنے کا مذاق بھی بنارہے ہیں۔
بالی وڈ میں سب سے زیادہ معاوضہ لینے والے اداکاروں کے نام لیں تو اس میں سلمان خان، اکشے کمار، شاہ رخ خان اور دیگر بڑے اداکار شامل ہیں۔
لیکن کیا آپ جانتے ہیں کہ بھارت میں سب سے زیادہ معاوضہ لینے والا گلوکار کون ہے؟
بالی وڈ میں اکثر گلوکاروں کو اتنا زیادہ معاوضہ نہیں دیا جاتا، یہ بھی کہا جاتا ہے کہ ماضی کے معروف گلوکار محمد رفیع اپنے وقت پر ایک گانے کا صرف 300 روپے معاوضہ لیتے تھے۔
پھر وقت کے ساتھ ساتھ چیزیں اور حالات تبدیل ہوئے اور اب یہ حال ہے کہ بالی وڈ میں ایک ایسا گلوگار بھی ہے جو صرف ایک گانا گانے کا 3 کروڑ بھارتی روپے معاوضہ لیتا ہے۔
آپ کو یہ جان کر شاید حیرانی بھی ہو ، یہ نام ارجیت سنگھ ،شریا گھوشال یا سونو نگم کا نہیں ہے۔
پھر یہ گلوکار کون ہے؟
بھارتی میڈیا کے مطابق اے آر رحمان اس وقت بھارت میں سب سے زیادہ معاوضہ لینے والے گلوکار ہیں۔
انڈسٹری کے اندرونی ذرائع نے بھی تصدیق کی کہ اے آر رحمان ایک گانا گانے کے لیے 3 کروڑ روپے کی شاہانہ رقم وصول کرتے ہیں۔
واضح رہے کہ اے آر رحمان زیادہ تر میوزک کمپوزر کی ذمہ داریاں نبھاتے ہیں اور گلوکاری کم ہی کرتے ہیں، لیکن جس گانے میں بھی وہ اپنی آواز کا جادو جگاتے ہیں وہ گانا سپر ہٹ ہو ہی جاتا ہے۔
علاوہ ازیں بالی وڈ کے دیگر مشہور گلوکاروں کے معاوضے کے بارے میں بات کریں تو شریا گھوشال ایک گانے کا 25 لاکھ روپے معاوضہ وصول کرتی ہیں۔
بھارتی میڈیا کی رپورٹ کے مطابق ارجیت سنگھ ایک گانے کا 18 سے 20 لاکھ روپے معاوضہ لیتے ہیں جبکہ سونو نگم ایک گانے کا 15 سے 18 لاکھ روپے معاوضہ حاصل کرتے ہیں۔
بھارت: پنجاب سے تعلق رکھنے والے معروف آنجہانی گلوکار سدھو موسے والا کے والدین نے اپنے چھوٹے بیٹے کا چہرا دکھا دیا۔
بھارتی میڈیا کے مطابق آنجہانی گلوکار سدھو موسے والا کے والدین نے اپنے چھوٹے بیٹے کا چہرا سوشل میڈیا پلیٹ فارم انسٹاگرام پر سدھو موسے والا کے اکاؤنٹ پر دکھایا۔
سدھو کے والدین کی جانب سے اپنے سب سے چھوٹے بیٹے کا نام شبھدیپ رکھا گیا ہے، تصویر میں بچے کو ہلکے گلابی رنگ کی پگڑی پہنے دیکھا جاسکتا ہے۔
میڈیا
رپورٹس کے مطابق رواں سال مارچ میں سدھو موسے والا کے 60 سالہ والد بلکور
سنگھ اور ان کی 58 سالہ اہلیہ چرن کور کے ہاں بیٹے کی پیدائش ہوئی تھی۔
واضح رہے کہ سدھو موسے والا کا اصل نام شبھدیپ سنگھ تھا جنہیں 29 مئی 2022 کو ضلع مانسا کے گاؤں جواہر میں نامعلوم حملہ آوروں نے فائرنگ کرکے قتل کر دیا تھا۔
اس واقعے میں سدھو کی گاڑی پر 30 گولیاں برسائی گئی تھیں جس کے نتیجے میں سدھو موسے والا موقع پر ہی ہلاک ہوگئے تھے جب کہ ان کی گاڑی میں موجود 2 افراد شدید زخمی ہوئے تھے۔
سدھو موسے والا نے اپنے گانے خود لکھے اور تیار کیے جب کہ انہیں پنجابی کے امیر ترین گلوکاروں میں شمار کیا جاتا تھا۔
اداکار ارجن کپور سے علیحدگی کے بعد اداکارہ ملائیکہ اروڑا کی انسٹاگرام پر شیئر کی گئی اسٹوری وائرل ہورہی ہے۔
کچھ روز قبل اداکار کی جانب سے اپنی عمر سے بڑی ملائیکہ اروڑا سے بریک اپ ہونے کی تصدیق کی گئی۔
ارجن نے اپنی نئی فلم سنگھم اگین کی تشہیر کے لیے ہونے والے ایک ایونٹ میں بتایا تھا کہ وہ اب سنگل ہیں۔
تاہم بریک اپ کے بعد ملائیکہ کی ذومعنی سوشل میڈیا پوسٹ سامنے آئی جسے ان کے مداح ارجن کے ساتھ ہونے والے بریک اپ سے منسلک کررہے ہیں۔
اداکارہ کی جانب سے انسٹاگرام پر گڈمارننگ کا پیغام شیئر کیا گیا جس کے ساتھ لکھا تھا کہ 'ہر مثبت سوچ ایک خاموش دعا یا عبادت ہوتی ہے جو آپ کی زندگی کو تبدیل کردیتی ہے'
یاد رہے کہ ملائیکہ اور ارجن نے 2018 میں ڈیٹنگ شروع کی تاہم انہوں نے اپنے تعلقات کو کئی عرصے تک چھپا کررکھا، دونوں کے تعلق کی خبریں منظر عام پر آنے کے بعد ان کی شادی کے حوالے سے بھی افواہیں سرگرم رہیں تاہم جوڑے کی جانب سے کبھی بھی شادی کی افواہوں پر ردعمل نہیں دیا گیا۔
گزشتہ ماہ ملائیکہ کے والد انیل مہتا کی خودکشی پر ارجن کپور اداکارہ سے ملنے گھر بھی آئے تھے۔
بالی وڈ کی معروف جوڑی ایشوریا رائے اور ابھیشیک بچن طلاق کی خبروں کی زد میں ہیں لیکن اب حال ہی میں دونوں سے متعلق نئی تفصیل سامنے آئی ہے۔
بھارتی میڈیا رپورٹس کے مطابق اب دونوں ایک ساتھ ایک فلم میں جلوہ گر بھی ہونے جارہے ہیں، میگا اسٹارز مشہور فلم ساز منی رتنم ایک نئی ہندی فلم پر کام کر رہے ہیں جس میں اس جوڑی کو کاسٹ کرنے کی خبریں ہیں۔
منی رتنم نے 2007 میں فلم گرو کے بعد انہیں راون میں بھی اکٹھا کاسٹ کیا تھا، اب وہ ایک اور فلم کےلیے دلچسپ کہانی تلاش کر چکے ہیں جس میں یہ جوڑی پھر نظر آئے گی۔
رپورٹس کے مطابق منی رتنم وہ شخص ہیں جنہوں نے ایشوریا اور ابھیشیک میں قربیتیں بڑھانے میں اہم کردار ادا کیا تھا، دونوں کی لوو اسٹوری کا آغاز فلم گرو کے سیٹ سے ہی ہوا تھا۔
واضح رہے کہ ابھیشیک بچن سے متعلق خبریں زیرِ گردش ہیں کہ وہ اداکارہ نمرت کور کے ساتھ رومانوی تعلقات میں ہیں جبکہ ایشوریا رائے سے ان کی علیحدگی ہو گئی ہے۔
اس حوالے سے دونوں اداکاروں کی جانب سے کسی قسم کا کوئی بیان سامنے نہیں آیا جبکہ اداکارہ نمرت کور ابھیشیک سے تعلقات کی تردید کر چکی ہیں اور کہہ چکی ہیں کہ وہ اور ابھیشیک دوست سے زیادہ کچھ نہیں ہیں۔
