وزیراعلیٰ مریم نوازشریف سے مختلف اضلاع سے تعلق رکھنے والے ارکان اسمبلی کی ملاقات ، ملاقاتوں میں سیاسی صورتحال اور ترقیاتی امور پر تبادلہ خیال کیا گیا، ارکان اسمبلی نے متعلقہ حلقوں کے مسائل اور عوامی ضروریات سے آگاہ کیا۔مریم نواز نے کہا ہے کہ عوام کے مسائل حل کرنا ترجیح ہے،ممکنہ وسائل ضرور فراہم کریں گے۔
مریم نواز نے کہا ہے کہ گلی محلے،شہروں اور دیہات کی صفائی ستھرائی کا پائیدار نظام وضع کررہے ہیں،ڈویژنل ہیڈکوارٹر اور بڑے شہروں میں پبلک پرائیویٹ پارٹنر شپ کے تحت سالڈ ویسٹ مینجمنٹ سسٹم لارہے ہیں،ہر گلی محلے کو صاف دیکھنا چاہتی ہوں، جلد کام شروع کر دیا جائے گا،عوام کے مسائل حل کرنا ترجیح ہے،ممکنہ وسائل ضرور فراہم کریں گے۔

وزیر اعلیٰ پنجاب نے کہا ہے کہ ساہیوال میں فراہمی و نکاسی آب کا جدید ترین پراجیکٹ تیزی سے تکمیل کی جانب گامزن ہے،ملتان، جہانیاں، وہاڑی اور دیگر شہروں کے لئے ملتان وہاڑی ایکسپریس وے بنائیں گے،سیالکوٹ کے ہسپتال میں کیتھ لیب اور کارڈیالوجی کی دیگر سہولیات فراہم کی جائیں گی۔
ملاقات کرنے والوں میں جہانیاں کے ایم این اے چوہدری افتخار نذیر، ساہیوال کے ایم پی اے قاسم ندیم، لاہور کے ایم پی اے محمد شعیب صدیقی،سیالکوٹ کے ایم پی اے خرم خان ورک شامل،سینئر صوبائی وزیر مریم اورنگزیب، سینیٹر پرویز رشید،معاون خصوصی ذیشان ملک بھی موجود تھے۔

وزیر اعلیٰ خیبر پختونخوا کی دھمکی کے بعد پشاور الیکٹرک سپلائی کمپنی (پیسکو) بجلی کی لوڈشیڈنگ میں کمی پر راضی ہوگیا۔

علی امین گنڈاپور نے گزشتہ روز پیسکو کو وارننگ دیتے ہوئے لوڈشیڈنگ کم کرنے کی ہدایت کی تھی۔ انہوں نے کہا تھا کہ آج رات تک لوڈشیڈنگ کم نہ ہوئی تو کل پیسکو کا انتظام سنبھالوں گا۔

آج چیف پیسکو متعلقہ عملے کے ہمراہ وزیر اعلیٰ ہاؤس پہنچے اور علی امین گنڈاپور کو صوبے میں بجلی کی لوڈشیڈنگ سے متعلق بریفنگ دی اور لوڈشیڈنگ کم کرنے کی یقین دہانی کروائی۔

ملاقات میں وزیر اعلیٰ کے پی اور چیف پیسکو میں لوڈشیڈنگ کا نیا شیڈول جاری کرنے پر اتفاق ہوا جس کے مطابق لوڈشیڈنگ 22 گھنٹے سے کم کر کے 18 گھنٹے کی جائے گی جبکہ 18 گھنٹے کی لوڈشیڈنگ کو 14 گھنٹے کیا جائے گا۔

اس موقع پر علی امین گنڈاپور نے کہا کہ نئے شیڈول پر عمل درآمد کیلیے پیسکو حکام آج ہی میکنزم تیار کریں، نیا شیڈول تمام اضلاع کے ڈپٹی کمشنرز اور ڈی پی اوز کو بھیجا جائے، شیڈول سے ایک منٹ زیادہ کی بھی لوڈشیڈنگ ہو تو ایکسئین کے خلاف مقدمہ درج کیا جائے۔

وزیر اعلیٰ کے پی نے کہا کہ بجلی سے متعلق مسائل کے حل کیلیے وفاقی حکومت کے ساتھ بات کرنے کیلیے تیار ہیں، صوبے کے عوام کو فوری ریلیف دیا جائے گا تو ہی بات چیت ہوگی۔

انہوں نے مزید کہا کہ لوگوں کو فوری ریلیف نہ ملا تو امن و امان کے سنجیدہ مسائل جنم لینے کا خدشہ ہے، صوبائی حکومت اپنے بقایا جات سے کٹوتی کروا کر ریلیف دینا چاہتی ہے، بجلی مہنگی ہونے کے باوجود بجلی مل رہی ہے اور نہ ہی ٹرانسمیشن کا نظام ٹھیک ہو رہا ہے۔

ان کا کہنا تھا کہ صوبے میں لائن لاسز کی ذمہ دار وفاقی حکومت اور پیسکو ہے، سزا صوبے کے عوام کو دی جا رہی ہے جو کسی صورت قابل قبول نہیں۔

وفاقی وزیرداخلہ محسن نقوی میانوالی کے علاقے مسلم کالونی میں شہید میجر بابر خان کی رہائش گاہ پہنچ گئے۔

محسن نقوی نے ایف سی بلوچستان نارتھ کے  شہید میجر  بابر خان کے والد نور خان  سے ملاقات کی، انہیں دلاسہ دیا۔ محسن نقوی  شہید میجر بابر خان کے بھائیوں کیپٹن ناصر اور سہیل خان سے ملے اور تعزیت کا اظہار کیا ۔ 

وزیرداخلہ محسن نقوی نے شہید میجر بابر خان کے والد نور خان کے بلند حوصلے کو سراہا، کہا کہ قوم کو آپ جیسے بلند حوصلہ والد  پر فخر ہے ۔ شہید میجر بابر خان جیسے دلیر بیٹے کے والد کو پوری قوم کا سلام ہے۔ آپ جیسے والد کا حوصلہ دیکھ کر ہمارا سر فخر سے بلند ہو گیاہے۔ شہید میجر بابرخان کے والد کا حوصلہ پاک دھرتی کے مضبوط وجود کی علامت ہے۔ ہمارا ایمان ہے کہ شہید ہمیشہ زندہ رہتے ہیں اور شہید میجر بابر خان بھی ہمارے دلوں میں زندہ ہیں اور زندہ رہیں گے۔

محسن نقوی نے بلوچستان میں دہشتگردوں کے خلاف آپریشن میں شہید میجر بابر خان کے درجات کی بلندی کے لئے دعا کی، انہوں نے شہید میجر بابر خان کے اہل خانہ کے صبر جمیل کی دعا کی ۔

وزیرداخلہ محسن نقوی نے دہشتگردوں کو جہنم واصل کرنے پر شہید میجر بابر خان کی جرات کو خراج عقیدت پیش کیا، کہا کہ جس قوم کے پاس شہید میجر بابر خان  جیسے بہادر سپوت ہوں، اسے دشمن شکست نہیں دے سکتا۔ شہید بابر خان قوم کا ہیرو ہے۔ پاک دھرتی کے بہادر سپوت میجر بابر خان نے جان دے کر دہشتگردوں کے مذموم عزائم کو ناکام بنایا۔ قوم کو بجا طور پر میجر بابر خان جیسے بہادر بیٹوں پر ناز ہے۔ شہید میجر بابر خان قوم کا ہیرو ہے اور پاکستانی قوم اس جری ہیرو کی لازوال قربانی کو قدر کی نگاہ سے دیکھتی ہے۔ دہشتگردوں اور ان کے سہولت کاروں کے خلاف آپریشن پوری طاقت سے جاری رہے گا۔ 

فرنٹیئر کور خیبرپختونخوا ساوتھ کے بریگیڈئر عامر  ، ڈپٹی کمشنر میانوالی، ڈی پی او میانوالی اور اعلی سول و عسکری حکام بھی اس موقع پر موجود تھے ۔ 

وزیراعظم شہبازشریف نے کہا ہے کہ وفاقی حکومت نے آزادکشمیر کے بھائیوں اور بہنوں کیلئے 23 ارب روپے کا اعلان کیا اب اجتماعی کاوشوں کے نتیجے میں آزادکشمیر میں احتجاجی تحریک ختم ہوچکی۔

کابینہ اجلاس میں گفتگو کرتے ہوئے وزیراعظم نے کہا کہ آزادکشمیر کے معاملے پر کل ہماری میٹنگ ہوئی جس میں صدر آصف زرداری ،سیاسی قائدین ، اتحادیوں اور آزادکشمیرحکومت جمع ہوئی اور طویل مشاورت کے بعد ہم نے آزادکشمیر سے متعلق اہم فیصلے کئے۔

انہوں نے کہا کہ آزادکشمیر میں ایک احتجاجی تحریک شروع ہوئی ان کے مطالبات سنے اور تحریک کے مطالبات پر اتفاق رائے کیاگیا، وفاقی حکومت نے آزادکشمیر کے بھائیوں اور بہنوں کیلئے23ارب روپے کا اعلان کیا۔

شہبازشریف نے کہا کہ آزاد کشمیر کےعوام سے میں چند روز میں خود بھی ملنے جاؤں گا یہ اجتماعی کاوشوں کے نتیجے میں آزادکشمیر میں احتجاجی تحریک ختم ہوچکی مگر افسوس کی بات یہ ہے کہ اس احتجاجی تحریک میں جانی نقصان ہوا، آزادکشمیر میں ایک سپاہی ، کچھ شہری شہید اور کئی زخمی ہوئے ہیں۔

ان کا کہنا تھا کہ قائداعظم نےجیسے فرمایا کہ کشمیر پاکستان کی شہ رگ ہے ہمیں بطور ریاست اورنمائندوں کو ہمیں عوام کی باتوں کو سننا اور سمجھنا چاہیے ہمیں مل بیٹھ کر معاملات کو طے کرنے کی کوشش کو فروغ دینا چاہیے۔

وزیراعظم نے واضح کیا کہ آزادکشمیر کی حکومت نے تحمل سے کام لیا کچھ لوگ سوچ کر آئے تھے کہ اس تحریک کی آڑ میں امن وامان تباہ اورمعاملات خراب کرنا ہے انسانی جانیں گئیں جس کا ہم سب کو افسوس ہے تاہم صدر مملکت آصف زرداری ،وزیراعظم آزادکشمیر ،سرکاری افسران کا شکرگزار ہوں کہ معاملہ حل ہو گیا۔